Rossiyada oʻlat gumoni haqidagi xabarlardan soʻng Tramp yordam vaʼda qildi
AQSH prezidenti Donald Tramp Irkutsk viloyatida oʻlat boʻlishi mumkinligi haqidagi xabarlar ortidan Rossiyaga yordam berishga tayyorligini bildirdi. Rossiya rasmiylari esa vafot etgan bemorga sababi aniqlanmagan pnevmoniya tashxisi qoʻyilganini maʼlum qilgan. Oʻlat tarqalgani haqidagi taxminlar tasdiqlanmagan.
Rossiyada oʻlat gumoni haqidagi xabarlardan keyin Tramp yordam berishga vaʼda berdi
Tramp 5-oktabr kuni jurnalistlar savollariga javob berar ekan, Vashington Irkutsk viloyatidagi vaziyatni sinchkovlik bilan kuzatayotganini aytdi.
«Biz yordam beramiz. Bunday muammoga duch kelgan har qanday tomonga doim yordam beramiz», - dedi AQSH prezidenti.
Shu bilan birga, Tramp bu masala yuzasidan Rossiya rasmiylari bilan hali aloqaga chiqmaganini ham qayd etdi. Yordamning aniq shakli va qachon ko‘rsatilishi haqida maʼlumot berilmadi.
Oʻlat boʻlishi mumkinligi haqidagi xabarlar Irkutsk oʻlatga qarshi institutida ishlagan 28 yoshli Darya Shipilovaning vafotidan soʻng tarqaldi. U sentabr oxirida shifoxonaga yotqizilgan va 2-oktabr kuni vafot etgan. Rospotrebnadzor unga «kelib chiqish sababi aniqlanmagan pnevmoniya» tashxisi qoʻyilganini maʼlum qilgan.
Mahalliy OAVlarga koʻra, voqeadan keyin qariyb 200 kishi karantinga olingan. Ijtimoiy tarmoqlarda laboratoriyada oʻlat qoʻzgʻatuvchisi saqlangan probirka sinib ketgani haqidagi taxminlar ham tarqalgan.
Biroq Rospotrebnadzor institutda patogen mikroorganizmlar bilan ishlash jarayonida hech qanday avariya holati aniqlanmaganini bildirdi. Idora maʼlumotiga koʻra, bemordan olingan namunalarda uning kasbiy faoliyati bilan bogʻliq mikroorganizmlar ham topilmagan.
Idoraning keyingi bayonotida Irkutsk viloyatida sanitariya-epidemiologik vaziyat osoyishta ekani, bemor bilan muloqotda boʻlganlarning 60 foizi ustidan tibbiy kuzatuv yakunlangani aytildi. Tekshiruvlarda ikki kishida COVID-19 va yana ikki kishida rinovirus infeksiyasi aniqlangan, boshqa infeksiya qoʻzgʻatuvchilari topilmagan.
Kreml matbuot kotibi Dmitriy Peskov ham jurnalistlarni Rospotrebnadzor bayonotlariga tayanishga chaqirdi va hodisa tafsilotlarini muhokama qilmadi.
Irkutskdagi voqealar haqidagi xabarlar ortidan Markaziy Osiyo mamlakatlarida ham ehtiyot choralari kuchaytirilmoqda. Qozogʻiston va Qirgʻiziston sanitariya-karantin nazoratini kuchaytirgan.
Oʻzbekistonda esa oʻta xavfli infeksiyalarning mamlakatga kirib kelishi va tarqalishining oldini olish uchun tegishli xizmatlar shayligi oshirilgan. Sanepidqoʻmita vaziyat rasmiy maʼlumotlar asosida kuzatilayotganini bildirib, aholini tasdiqlanmagan xabarlarga ishonmaslikka chaqirgan.