Rossiyalik tadbirkordan yuz minglab dollarlik «sovgʻa»: kichik Tramp atrofida mojaro
Kichik Donald Trampning Bahama orollaridagi hashamatli toʻy bazmi Vashingtonda siyosiy mojaroga aylandi. Rossiya prezidenti Vladimir Putin bilan aloqalari bor deb taʼriflanayotgan Umar Kremlyovning bayram xarajatlarini qoplagani yuzasidan tekshiruv boshlandi.
Rossiyalik tadbirkordan yuz minglab dollarlik «sovgʻa»: kichik Tramp atrofida mojaro
Kichik Donald Trampning toʻyi bilan bogʻliq mojaro 14-15 sentabr kunlari ProPublica nashri chop etgan maqoladan keyin kuchaydi. Bu yerda gap marosimning oʻzi haqida emas, balki Bahama orollaridagi hashamatli bayram uchun kim va qanday qilib pul toʻlagani ustida ketmoqda.
2026-yil may oyida AQSH prezidenti Donald Trampning oʻgʻli kichik Donald Tramp (48 yoshda) model va kibor ayol Bettina Andersonga (39 yoshda) turmushga chiqdi. Nikohni rasmiy roʻyxatdan oʻtkazish 21-may kuni Florida shtatidagi Palm-Bichda boʻlib oʻtdi, tor doiradagi marosim esa 22-may kuni tashkil etildi. Keyin esa Bahama orollaridagi ikkita xususiy orolda, jumladan Little Pipe Cay’da, uch kunlik bazm oʻtkazildi. Mehmonlar soni qariyb 50 nafar edi.
Taklif etilganlar orasida Trampning yana bir oʻgʻli Erik va kuyovi Jared Kushner ham bor edi. AQSH prezidentining oʻzi toʻyda qatnashmadi — u Eron atrofidagi vaziyat sabab Vashingtonda qolgan boʻlishi mumkin. Dastlab er-xotin toʻyni Oq uyda oʻtkazish variantini ham koʻrib chiqqan, biroq keyin bu fikrdan voz kechishgan.
ProPublica maʼlumotiga koʻra, hujjatlar va tadbirni tashkil etishdan xabardor boʻlgan uch manbaga tayangan holda, xarajatlarning katta qismini — yuz minglab dollarni — rossiyalik tadbirkor va sport funksioneri Umar Kremlyov (Umar Nazarovich Kremlyov, ilgari Lutfulloyev, 1982-yilda tugʻilgan) qoplagan.
Toʻlovlar Kremlyov rahbarlik qiladigan Xalqaro boks assotsiatsiyasi (IBA) bilan bogʻliq Dubaydagi IB Challenger kompaniyasi orqali amalga oshirilgan. IBA avvalroq Rossiyaning «Gazprom» kompaniyasi tomonidan moliyalashtirilgan.