Rossiyada Kennedining Ukraina uchun jang qilgan qarindoshi sirtdan hibsga olindi
Rossiyada Kennedining Ukrainadagi janglarda ishtirok etgan qarindoshi sirtdan hibsga olindi.
Rossiya sudi AQSH sobiq prezidenti Jon Kennedining nevara jiyani, AQSH sog‘liqni saqlash vaziri kichik Robert Kennedining o‘g‘li Konor Kennedini sirtdan hibsga olish to‘g‘risida qaror qabul qildi. Bild nashrining xabar berishicha, u Ukraina qurolli kuchlari safida yollanma askar sifatida janglarda qatnashganlikda ayblanmoqda.
Konorning so‘zlariga ko‘ra, u 2022-yilda harbiy tajribasi bo‘lmaganiga qaramay, ko‘ngilli ravishda Ukrainaga borib, xalqaro legionga qo‘shilgan. U Ukraina shimoli-sharqida taxminan ikki yarim oy bo‘lgan, shundan so‘ng AQSHga qaytgan. Uning oilasi bu haqda u qaytganidan keyin xabar topgan.
Rossiya qonunchiligiga binoan, Kennediga yetti yildan o‘n yilgacha ozodlikdan mahrum qilish jazosi tayinlanishi mumkin. TASS agentligining ma’lumotlariga ko‘ra, himoya tomoni sud qarori ustidan allaqachon shikoyat kiritgan.
Ma’lumot uchun, Konor 2012-yilda amerikalik qo‘shiqchi Teylor Svift bilan qisqa muddatli munosabatda bo‘lgan. Hozirda u advokat bo‘lib ishlaydi. 2026-yilning mart oyida u braziliyalik xonanda Juliya Biga uylangan.