Rossiyada ekspert «nomaqbul tashkilot» bilan hamkorlikda ayblandi
Rossiyadagi «Sova» tadqiqot markazi xodimi Olga Sibirevaga «nomaqbul tashkilot» bilan hamkorlik qilish bo‘yicha ma’muriy ish ochildi. Markaz ma’lumotiga ko‘ra, bunga Sibirevaning Rossiyada vijdon erkinligi haqidagi ochiq hisobotlariga AQSh Davlat departamenti tashabbusi bilan tuzilgan xalqaro tashkilot o‘z materiallarida havola bergani sabab bo‘lgan.
Rossiyada ekspert Olga Sibirevaga, uning materiallaridan boshqa loyiha foydalangani sababli, "nomaqbul tashkilot" bilan hamkorlik qilish bo‘yicha ma’muriy ish ochildi. Bu haqda "Sova" tadqiqot markazi 17-avgust kuni xabar berdi.
"Sova" markazining ma’lumotiga ko‘ra, avgust oyi boshida politsiya Sibirevaning uyida tintuv o‘tkazib, uning texnikasi va kitoblarini olib qo‘ygan. Tintuv paytida tezkor xodimlar "nomaqbul tashkilot" bilan hamkorlik masalasini tilga olgan, ammo qaysi tashkilot ekanligini aniqlashtirmagan.
17-avgust kuni Sibireva chaqiruv qog‘ozi bilan Naro-Fominsk shahar prokuraturasiga borgan va u yerda ish qo‘zg‘atish to‘g‘risidagi qarordan o‘ziga qo‘yilgan ayblov tafsilotlarini bilib olgan. Unga "Din va e’tiqod erkinligi bo‘yicha xalqaro alyans" (International Religious Freedom or Belief Alliance) bilan hamkorlik qilish aybi qo‘yilmoqda. Ushbu tashkilot Rossiyada 2024-yilda "nomaqbul" deb e’lon qilingan.
Hozircha ma’muriy protokolning sudda ko‘rib chiqiladigan sanasi belgilanmagan.
"Sova" markazi ish ochilishiga Sibirevaning Rossiyada vijdon erkinligiga bag‘ishlangan 2024 va 2025-yillik hisobotlaridan xalqaro alyans materiallarida foydalanilgani sabab bo‘lganini ta’kidlamoqda. Ushbu hisobotlar "Sova" markazining saytida ochiq e’lon qilingan va ulardan erkin foydalanish mumkin. Markazning o‘zi esa bu xalqaro alyans bilan hech qachon hamkorlik qilmaganini bildirdi.
"Sova"ga ko‘ra, bu Rossiyada shaxs "nomaqbul tashkilot" uning ochiq e’lon qilingan matnlariga havola bergani uchun mazkur tashkilot bilan "hamkorlik qilish"da ayblangan ilk ma’lum holatdir.
Din va e’tiqod erkinligi bo‘yicha xalqaro alyans 2020-yilda AQSh Davlat departamenti tashabbusi bilan tashkil etilgan. Bu turli mamlakatlar vakillarini birlashtiruvchi xalqaro tarmoq bo‘lib, unga 38 davlat vakillari qo‘shilgan. Tashkilot diniy ozchiliklarning huquqlarini himoya qilish, diniy e’tiqod asosidagi kamsitish va ta’qiblarga qarshi kurashishni o‘z maqsadlaridan biri sifatida ko‘rsatadi.
Rossiya Bosh prokuraturasi esa mazkur alyansni AQSh va uning ittifoqchilari manfaatlariga xizmat qiluvchi tuzilma deb hisoblaydi. Rossiya rasmiylariga ko‘ra, tashkilot a’zolari Moskvaga nisbatan sanksiya bosimini kuchaytirish tarafdori. Alyans o‘z hisobotlarida Rossiyada diniy tashkilotlar va dindorlarga nisbatan ta’qiblar haqida ma’lumotlar keltirib boradi. Xususan, alyans Rossiyada ta’qiblarni, shuningdek, Rossiya armiyasi nazoratidagi Ukraina hududlarida Kreml va Moskva patriarxiyasiga sodiq bo‘lmagan ruhoniylar hamda dindorlarga nisbatan bosim holatlarini qayd etib keladi.