Rossiya Litvaga yadroviy qurol qo‘llash bilan tahdid qildi
Rossiya Litvaga yadroviy qurol bilan tahdid qildi
Agar Litva o‘z hududida yadro arsenallarini joylashtirsa, Rossiya yadro qurollari shu mamlakatga qaratiladi. Bu haqda Rossiya prezidenti matbuot kotibi Dmitriy Peskov ma’lum qildi.
“Bu qurollar G‘arbga emas, Sharqqa — ya’ni bizga qaratilishi aniq”, deya Peskovning so‘zlarini “Interfaks” keltirmoqda.
Kreml vakili ta’kidlashicha, agar biror hududda Rossiyaga qaratilgan yadro quroli paydo bo‘lsa, u holda o‘sha mamlakat hududi ham Rossiya yadro qurollari nishoniga aylanadi. Uning aytishicha, bu vaziyatning keskinlashuvi va taranglashuvi nuqtayi nazaridan juda jiddiy burilish bo‘ladi.
2026-yil iyunida Litva hukumati o‘z hududida yadro qurolini joylashtirish bo‘yicha muzokaralar olib borayotganini tasdiqlagan edi. Financial Times xabariga ko‘ra, gap yadroviy kallaklarni tashishga qodir bo‘lgan Amerika bombardimonchi samolyotlari haqida ketmoqda.
Litva konstitutsiyasining amaldagi moddasiga ko‘ra, mamlakatda ommaviy qirg‘in qurollari yoki xorijiy harbiy bazalarni joylashtirish taqiqlangan. Shu sababli Litva rasmiylari bu taqiqni bekor qilish uchun konstitutsiyaga o‘zgartirish kiritish masalasini muhokama qilishga tayyorligini bildirgan.
1997-yildagi Rossiya va NATO o‘rtasidagi kelishuvda alyansning yangi a’zolar hududida yadro qurolini joylashtirish niyati, rejasi yoki sababi yo‘qligi belgilangan. Rossiya va Ukraina o‘rtasidagi urush boshlanganidan keyin Moskva o‘zining taktik yadro qurollarini Belarus hududida joylashtirgan.
Avvalroq NATO Rossiyaning ehtimoliy hujumi uchun uch bosqichli reja ishlab chiqqani haqida xabar berilgandi. Bu chora-tadbirlar Moskva Baltiqbo‘yi mamlakatlariga bostirib kirgan taqdirda qo‘llanadi. Alyans mamlakatni tiyib turish va hujumning oldini olish maqsadida bu harbiy rejalarni sir tutmaslikka qaror qilgan.