Boltiqbo‘yining ikki davlati Rossiya g‘allasi tranzitini taqiqlamoqchi

Boltiqbo‘yidagi ikki davlat Rossiya g‘allasi tranzitiga taqiq kiritmoqchi

Latviya va Litva o‘z portlari orqali Rossiya g‘allasini tashishni taqiqlash imkoniyatini ko‘rib chiqmoqda.

Ukrainaning Boltiq dengizidagi Rossiya portlariga dronlar bilan uyushtirgan hujumlari ortidan Moskva ushbu mamlakatlar orqali g‘alla tranzitini oshirgan edi. Bu holat ayniqsa Latviyada yaqqol sezildi. Reuters agentligi xabariga ko‘ra, oktyabr oyida g‘alla tashish hajmi keskin ko‘payishi mumkin.

Latviya bosh vaziri matbuot kotibining aytishicha, hukumat mamlakat hududi orqali Rossiya g‘allasi eksportini to‘liq taqiqlash masalasini muhokama qiladi. Litva esa aniq choralarni oshkor etmadi, biroq o‘z portlaridan Rossiya g‘allasini eksport qilish uchun foydalanishga endi toqat qilib bo‘lmasligini bildirdi.

“Litvaning infratuzilmasidan foydalanib Rossiya g‘allasini eksport qilish bizning qadriyatlarimizga zid”, dedi Litva bosh vaziri Mindaugas Sinkevichyus.

Uning qo‘shimcha qilishicha, joriy etilishi mumkin bo‘lgan cheklovlar Rossiya hududi va Kaliningrad viloyati o‘rtasidagi g‘alla tranzitiga ta’sir qilmaydi.

O‘tgan eksport mavsumida (2025-yil iyulidan 2026-yil iyunigacha) Rossiya g‘allasi eksportining 90 foizi, ya’ni 46,3 million tonnasi Qora va Azov dengizlari portlariga to‘g‘ri kelgan. Rossiyaning Boltiq dengizidagi portlari orqali esa bor-yo‘g‘i bir million tonna g‘alla jo‘natilgan.

Ukraina hujumlari fonida yangi mavsum boshidan avgust oyi o‘rtalarigacha Rossiyaning Boltiq portlariga g‘alla yetkazib berish hajmi besh million tonnaga yetdi.

Ukrainaning aviazarbalari Rossiyaning g‘alla eksport qilish quvvatining 80 foizdan ortig‘ini ishdan chiqardi. Mutaxassislar bahosiga ko‘ra, avgust oyida bug‘doy eksporti atigi 1,9 million tonnani tashkil etdi. Bu so‘nggi 16 yildagi eng past ko‘rsatkichdir.

Avvalroq Ukraina Rossiyaga Qora dengizda o‘t ochishni to‘xtatishni taklif qilgani va Moskva bu taklifni rad etgani haqida xabar berilgandi.