Rossiya bilan muzokara tarafdori Bolgariya saylovida yetakçilik qilmoqda

Rossiya bilan muzokaralarni qo‘llab-quvvatlovchi nomzod Bolgariya saylovida peshqadam bo‘ldi

Bolgariya milliy radiosi xabariga ko‘ra, 1-noyabr kuni o‘tkazilgan ovoz berish yakunlari bo‘yicha «Myara» agentligi o‘tkazgan parallel hisobda Yotova va vitse-prezidentlikka nomzod Kirill Vilçev juftligi 58,2 foiz ovoz to‘plagan.

Sobiq bosh vazir Andrey Gyurov va Georgi Kandev juftligini esa 38,6 foiz saylovchi qo‘llab-quvvatlagan.

Alpha Research agentligining parallel sanog‘ida ham Yotova oldinda — uning natijasi 57,4 foizni, Gyurovniki esa 39,6 foizni tashkil etgan. Bu ko‘rsatkichlar rasmiy yakuniy natijalar emas.

Andrey Gyurov brifingda mag‘lubiyatini tan olib, natijalar o‘zi uchun kutilmagan bo‘lsa-da, ularni qabul qilishini aytgan. Uning fikricha, Bolgariyani «og‘ir davrlar» kutmoqda, ammo mamlakat umumiy vazifalarni hal qilish uchun birlashish yo‘llarini izlashi kerak.

«Hech narsa behuda bo‘lmadi, eng yaxshisi hali oldinda. Biz rivojlanish uchun yaxshi asos yaratdik», - degan Gyurov.

Agar rasmiy natijalar ham Yotovaning g‘alabasini tasdiqlasa, u Bolgariyada prezidentlik saylovida g‘alaba qozongan birinchi ayol bo‘ladi. Yotova 2026-yil yanvarda Rumen Radev muddatidan oldin isteʼfoga chiqqanidan so‘ng vitse-prezident lavozimidan davlat rahbarligiga o‘tgan edi.

«Myara» agentligi ma’lumotiga ko‘ra, ikkinchi turda saylovchilarning 27,2 foizi ovoz berishda qatnashgan. Bu birinchi turdagi 23 foizlik ko‘rsatkichdan biroz yuqori.

25-oktabrda o‘tkazilgan birinchi turda prezidentlik uchun kurashgan 27 nomzodning hech biri g‘alaba uchun zarur ko‘pchilik ovozni to‘play olmagan. Yotova 34,76 foiz, Gyurov 31,95 foiz ovoz olgan. Millatchi «Uyg‘onish» partiyasi vakili Kostadin Kostadinovni esa 12,54 foiz saylovchi qo‘llab-quvvatlagan.

DW qayd etishicha, bu saylov Bolgariyaning tashqi siyosati, jumladan, Rossiyaning Ukrainaga qarshi urushiga munosabati va Moskva bilan aloqalari nuqtai nazaridan muhim hisoblanadi.

Sobiq jurnalist va Yevropa parlamenti deputati Yotova, o‘zidan avvalgi prezident Rumen Radev kabi, siyosiy raqiblariga nisbatan Rossiyaga iliqroq munosabatda. Gyurov esa yevropaparast qarashlarni ilgari surib, liberal-konservativ muxolifat qo‘lloviga tayangan.

Bolgariya prezidenti besh yil muddatga saylanadi. Birinchi turda g‘alaba qozonish uchun saylovchilarning kamida yarmi ishtirok etgan sharoitda ovozlarning yarmidan ko‘pini olish talab qilinadi. Aks holda, eng ko‘p ovoz olgan ikki nomzod ikkinchi turda kurashni davom ettiradi.