Rogʻun GES qurilish maydonchasida tuproq oʻpirilib tushdi, jabrlanganlar bor
Rogʻun GES qurilish maydonida tuproq oʻpirilib tushdi, jabrlanganlar bor
Tojikistondagi Rogʻun gidroelektr stantsiyasi qurilishida tunnellardan birida tuproq oʻpirilib tushdi. Guvohlarning soʻzlariga koʻra, beshdan ortiq ishchi jabrlangan. Hodisa 22 oktyabrda yuz bergan, biroq jabrlanganlarning ahvoli haqidagi rasmiy maʼlumotlar hozircha eʼlon qilinmagan.
OAV xabar berishicha, stantsiya xodimlaridan biri oʻpirilishni tunnel yonidagi qoyali uchastkani oʻzlashtirish paytida tuproq va toshlarning toʻplanib qolgani bilan bogʻlagan.
Uning soʻzlariga koʻra, keyinchalik toʻplangan suv tufayli ushbu massa oʻpirilib tushgan. U sodir boʻlgan voqeani "qurilish sifati bilan bogʻliq boʻlmagan tasodif" deb atadi, ammo shu bilan birga jabrlanganlar haqidagi maʼlumotni tasdiqlamadi ham, inkor etmadi ham.
Xavfsizlik nuqtai nazaridan ismlarini oshkor etmaslikni soʻragan guvohlar jurnalistlarga tuproq bosib qolishi oqibatida bir necha kishi qolganini aytib berishdi. Rogʻun GES vakillari hozircha sodir boʻlgan voqea yuzasidan izoh berishmadi.
Rogʻun GES qurilishidagi xavfsizlik masalalari ilgari ham koʻtarilgan edi. Jumladan, 2024 yil noyabr oyida qurilish maydonida avariya yuz berib, uning oqibatida uch nafar ishchi halok boʻlgan, yana bir kishi jarohat olgan edi.
2025 yilda qurilish xavfsizligi boʻyicha muhokamalar davom etdi. Loyihada ishtirok etayotgan Eron kompaniyasi xodimi sifatsiz materiallardan foydalanilgan boʻlishi mumkinligini aytdi. Boshqa bir xodim esa, aksincha, xalqaro moliya tashkilotlari ishlar sifatini har kuni tekshirayotganini taʼkidladi.
Oʻsha yili Tojikiston rasmiylari Rogʻun GESda sakkizta baxtsiz hodisa yuz berganini maʼlum qilib, jabrlanganlar va halok boʻlganlar soniga aniqlik kiritilmagan edi.
Rogʻun GES Vaxsh daryosida qurilmoqda va Tojikistonning strategik loyihalaridan biri hisoblanadi. Qurilish yakunlangach, balandligi 335 metr boʻlgan toʻgʻon dunyodagi eng balandiga aylanishi kerak. Stantsiya har birining quvvati 600 megavattdan boʻlgan oltata gidroagregatni oʻz ichiga oladi.
Hozirda ikkita agregat ishlamoqda, uchinchisini ishga tushirish 2027 yil sentyabr oyiga moʻljallangan. Jahon banki loyiha uchun 300 million dollar ajratdi, yana 500 million dollar Osiyo taraqqiyot bankidan kutilmoqda. Qurilishni toʻliq yakunlash 2035 yilga rejalashtirilgan. Rasmiylar yangi GES mamlakatdagi elektr energiyasi tanqisligini kamaytirishga yordam berishidan umid qilmoqda.