Renault retro uslubdagi yangi sport kupeni namoyish etdi

Renault retro uslubdagi yangi sport kupeni taqdim etdi

Renault kompaniyasi 1960-yillardagi Renault 8 Gordini sport sedanidan ilhom olgan konseptual kupeni namoyish qildi.

Allaqachon ishlab chiqarilayotgan R4 va R5 retro modellaridan farqli ravishda, bu konsept seriyali ishlab chiqarishga chiqmaydi, biroq uning dizaynidagi ayrim yechimlar kelajakdagi modellarga asos bo‘lishi mumkin.

Asl Renault 8 Gordini 1964-yilda tog‘ yo‘llari uchun mo‘ljallangan, orqa dvigatelli va orqa g‘ildiraklari yetakchi bo‘lgan oilaviy sedanning kuchaytirilgan talqini sifatida debyut qilgan. Model deyarli ikki baravar ko‘p quvvat, pasaytirilgan klirens, kuchaytirilgan tormozlar, to‘rtta yoki oltita dumaloq fara, shuningdek, oq poyga chiziqlari tushirilgan o‘ziga xos ko‘k rangga ega edi.

Yangi R8 Gordini Concept — past va keng siluetli ikki o‘rinli elektr kupe. Old qismida radiator panjarasining yo‘qligi, oltita dumaloq LED farali V shaklidagi kapot ajralib turadi. Orqa chiroqlar kuzov bilan bir tekis joylashgan bo‘lib, ular o‘chirilganida deyarli ko‘rinmaydi. Tashqi bezaklar orasida havo tortgichli sport bamperi, kengaytirilgan g‘ildirak arkalari, orqa ustunlardagi qotirmalar, tomdagi spoyler, orqa qismdagi ventilyatsiya panjarasi va katta diffuzor ham bor. Kuzov karbon bilan bezatilgan va an’anaviy ko‘k-oq rangga bo‘yalgan.

Renault texnik tafsilotlarni juda kam oshkor qildi. Ma’lum bo‘lishicha, konsept 266 ot kuchiga ega bitta elektromotor bilan jihozlangan va tortish kuchini orqa o‘qqa uzatadi.

Kompaniya ma’lumotiga ko‘ra, dizaynerlar 300 dan ortiq eskiz tayyorlagan. Asosiy maqsad «ham merosga, ham zamonaviylikka tayangan holda hissiyotlarni uyg‘otish» bo‘lgan.

Shu bilan birga, konsept ommaviy ishlab chiqarilmaydi. Ommaviy premyera Renault Carwalk tadbirida bo‘lib o‘tadi, undan so‘ng kupe Parij avtosalonida namoyish etiladi. Keyinroq konsept Renault Collections muzeyiga topshiriladi.