Qozogʻistonda yana bir yoʻlbars tabiatga qoʻyib yuborildi (video)

**Qozogʻistonda yana bir yoʻlbars tabiatga qoʻyib yuborildi (video)**

Qozog‘istonda Amur laqabli erkak Amur yo‘lbarsi Ili-Balxash davlat qo‘riqxonasiga ochiq tabiatga qo‘yib yuborildi. U mamlakatga yo‘lbarslarni qaytarish dasturi doirasida yovvoyi tabiatga qaytarilgan ikkinchi yo‘lbars bo‘ldi. Bu haqda Ekologiya va tabiiy resurslar vazirligiga tayanib Kazinform xabar berdi.

**Yo‘lbarslar 70 yildan so‘ng qaytmoqda**

Vazirlik ma’lumotiga ko‘ra, Qozog‘iston tabiatida 70 yildan ortiq vaqt davomida yo‘lbarslar bo‘lmagan. Endi esa tabiiy ekotizimlarni tiklash bo‘yicha ko‘p yillik sa’y-harakatlar natijasida bu yirtqichlar o‘zlarining tarixiy yashash hududlariga asta-sekin qaytmoqda.

Qozog‘istonga olib kelingach, Amur Ili-Balxash qo‘riqxonasidagi maxsus moslashuv maydonchasida saqlandi. U yerda mutaxassislar uni doimiy kuzatuv ostida ushlab turdi.

**Amurning tayyorgarligi tekshirildi**

Tabiatga qo‘yib yuborilishidan oldin yo‘lbars bir qator veterinariya ko‘riklari va xulq-atvor sinovlaridan o‘tdi. Mutaxassislar uning sog‘lig‘i, ov qilish ko‘nikmalari va mustaqil ravishda yemish topa olish darajasini baholadi. Shuningdek, uning insonga nisbatan reaksiyasi ham tekshirildi.

Sinovlar natijasi Amurning yovvoyi tabiatda mustaqil yashashga tayyorligini tasdiqladi. Keyingi kuzatuvlar uchun yo‘lbarsga maxsus moslama taqildi. Bu uning harakatlari va moslashuv jarayonini kuzatish imkonini beradi.

**Umit va kichik yo‘lbarschalar**

Avval tabiatga qo‘yib yuborilgan Umit laqabli urg‘ochi yo‘lbars qo‘riqxona hududini o‘rganishda davom etmoqda. U mustaqil ov qilmoqda va uning harakatlari ham GPS moslama orqali kuzatilmoqda. Mutaxassislar ta’kidlashicha, moslashuv jarayoni muvaffaqiyatli kechmoqda.

Katta yo‘lbarslar bilan birga Qozog‘istonga olib kelingan ikki bosh yo‘lbarschalar mutaxassislar nazorati ostida o‘sishda davom etmoqda. Ularni tabiatga qo‘yib yuborish haqidagi qaror ular yetarlicha yoshga yetgach va tegishli sinovlardan o‘tgach qabul qilinadi.