Qozogʻistonda «Palov markazi»dagi portlash boʻyicha jinoyat ishi yuzasidan hukm chiqarildi
Qozogʻistonda «Palov markazi»dagi portlash boʻyicha jinoyat ishi yuzasidan hukm eʼlon qilindi
Qozogʻistonda Shchuchinsk shahridagi «Palov markazi» kafesida fevral oyida sodir boʻlgan, 12 kishi halok boʻlgan va yana 11 kishi jarohatlangan portlash boʻyicha jinoyat ishini koʻrib chiqish yakunlandi.
Hodisa 2026 yil 26 fevralda yuz bergan. Kafeda gaz portlashi sodir boʻlib, undan keyin yongʻin boshlangan. Keyinchalik maʼlum boʻlishicha, voqeadan bir kun oldin muassasaga ikkita gaz balloni olib kelingan, ulardan biri ruxsat etilgan meʼyordan ortiq toʻldirilgan boʻlgan.
Sud aniqlashicha, ballon isitish radiatori yaqinida joylashgan. Isish natijasida uning ichidagi bosim ortib ketgan, oqibatda ballon devori yorilib ketgan. Shundan soʻng portlash va yongʻin sodir boʻlgan.
Tergov davomida, shuningdek, kafe egasi yongʻin xavfsizligi talablarini buzgani aniqlandi. Muassasada qoidalarni buzgan holda saqlangan gaz ballonlaridan foydalanilgan. Bundan tashqari, xodimlar gaz uskunalaridan foydalanish boʻyicha zarur yoʻriqnomadan oʻtishmagan.
Gaz quyish shoxobchasi direktorining ham javobgarligi aniqlandi. Sud u zarur hujjatlar, uskunalar va nazorat asboblarisiz, shuningdek, oʻqitilgan xodimlarsiz maishiy gaz ballonlarini toʻldirishga yoʻl qoʻygan degan xulosaga keldi.
Natijada uchchala sudlanuvchi ham aybdor deb topildi. Kafe egasi va gaz quyish shoxobchasi direktoriga yetti yildan, ballonlarni yetkazib beruvchiga esa olti yil ozodlikdan mahrum qilish jazosi tayinlandi. Sud qarorlari hali qonuniy kuchga kirmagan.