Qoraqalpogʻistonlik rassom Qidirboy Najimovning ijodiy ishlari Respublika bolalar kutubxonasida taqdim etildi
Respublika bolalar kutubxonasida qoraqalpogʻistonlik grafik rassom Qidirboy Najimovga bagʻishlangan koʻrgazma ochildi. Ekspozitsiyada uning Savitskiy muzeyi kollektsiyasidan oʻrin olgan kitoblar uchun illyustratsiyalari va grattaj texnikasidagi ishlari taqdim etilgan. Dekabr oyiga qadar koʻrgazma doirasida maʼruzalar va mahorat darslari boʻlib oʻtadi.
Respublika bolalar kutubxonasida qoraqalpoq rassomi Qidirbay Najimov ijodiga bagʻishlangan «Qidirbay Najimov. „Qoraqalpogʻiston“ nashriyoti kitob grafikasi» koʻrgazmasi ochildi.
U nashriyotga 1963 yilda kelgan va keyinchalik uning bosh rassomiga aylangan.
Faoliyati davomida Qidirbay Najimov yuzlab kitoblarni bezadi — bular qoraqalpoq folklori va eposi asarlari, xalq ertaklari, bolalar adabiyoti, shuningdek, xorijiy va shoʻro mualliflari asarlarining tarjimalaridir.
Ekspozitsiyada I. V. Savitskiy nomidagi Qoraqalpogʻiston Davlat sanʼat muzeyi toʻplamidan olingan asl grafika ishlari va Respublika bolalar kutubxonasi fondidagi nashrlar namoyish etilgan. Tashrif buyuruvchilar asl nusxalarni ular yaratilgan kitoblar bilan yonma-yon koʻrishlari mumkin.
Najimovning oʻziga xos uslublaridan biri grattaj — mum va tush bilan qoplangan yuzaga chizilgan rasm edi. Kontrastli grafika nafaqat ifodali badiiy effekt berar, balki bosmada qayta ishlab chiqarish uchun ham juda mos kelar edi.
Dekabr oyiga qadar koʻrgazmaga qoraqalpogʻistonlik rassomlar va tadqiqotchilar ishtirokidagi dastur hamrohlik qiladi. Tadbirlar doirasida bolalar grattaj, trafaret va bosma texnikalar, kitob dizayni, animatsiya hamda mahalliy folklor bilan tanishishlari mumkin boʻladi.
Qoraqalpoq rassomi Nargiz Berdimuratova bilan ishtirokchilar trafaretlar yordamida kompozitsiyalar yaratadilar, rassom Oygul Sarsen bilan esa chiziqlar va ranglar ustida ishlaydilar. Kamoliddin Behzod nomidagi Milliy rassomlik va dizayn institutining miniatyura va kitob grafikasi kafedrasi talabalari bolalarni bosma texnikalar bilan tanishtiradilar.
Shuningdek, Savitskiy muzeyi ilmiy xodimi, sanʼatshunoslik boʻyicha PhD Muzaffar Ishanovning zamonaviy qoraqalpoq vizual tilining shakllanishi haqidagi maʼruzasi boʻlib oʻtadi. Goje Project tashabbusi jamoasi bolalar uchun hudud folkloriga bagʻishlangan ertakxonliklar tashkil etadi.
Koʻrgazma Oʻzbekiston Madaniyat va sanʼatni rivojlantirish jamgʻarmasi, Igor Savitskiy nomidagi Davlat sanʼat muzeyi hamda Nukusdagi Respublika bolalar kutubxonasi koʻmagida tayyorlandi.
Kirish bepul. Ayrim tadbirlarda ishtirok etish uchun oldindan roʻyxatdan oʻtish talab etiladi.