Qoʻqonda Mandalaki uyi 2027 yildan boshlab restavratsiya qilinadi
Madaniy meros agentligi 1903 yilga oid meʼmorchilik yodgorligini restavratsiya qilishni respublika byudjeti mablagʻlari hisobidan boshlashni rejalashtirmoqda.
2027 yildan Qoʻqonda Mandalaki uyini restavratsiya qilish rejalashtirilmoqda
Fargʻona viloyatining Qoʻqon shahrida joylashgan «Mandalaki uyi» meʼmoriy yodgorligini restavratsiya qilish ishlarini 2027 yilda boshlash niyatidalar. Ishlarni moliyalashtirish respublika byudjetidan amalga oshiriladi. Bu haqda Madaniy meros agentligi xabar beradi.
Bino 1903 yilda qurilgan boʻlib, Oʻzbekistonning tarixiy-meʼmoriy merosini aks ettiruvchi obʼyektlar qatoriga kiradi.
«Mandalaki uyi» Oʻzbekiston Respublikasi Vazirlar Mahkamasining 2019 yil 4 oktyabrdagi 846-sonli qarori bilan Moddiy madaniy merosning koʻchmas mulk obʼyektlari milliy roʻyxatiga kiritilgan.
Obʼyekt davlat mulkida boʻlib, tezkor boshqarish huquqi asosida Fargʻona viloyati Madaniy meros boshqarmasiga biriktirilgan.
Madaniy meros agentligi taʼkidlashicha, restavratsiya ishlari binoning tarixiy meʼmoriy qiyofasini saqlab qolish, uning konstruktiv mustahkamligini taʼminlash va tarixiy qiymatini kelajak avlodlarga yetkazishga qaratilgan.
Idora, shuningdek, fuqarolarni internetda tarqatilayotgan asossiz xabarlarga ishonmaslikka chaqirdi.