Qirolning Karib havzasiga tashrifi «oʻtmishimizning eng qora kunlari»dan qochmaydi
Soʻnggi yillarda Qirol Buyuk Britaniyaning quldorlikdagi roli uchun oʻzining «shaxsiy qaygʻusi»ni izhor qildi.
Bukingem saroyi qirol Charlzning Karib havzasiga boʻlajak tashrifi «oʻtmishimizning eng qora kunlari»ni chetlab oʻtmasligini maʼlum qildi.
Safar davomida Qirol Buyuk Britaniyaning transatlantik qul savdosidagi roli uchun uzr soʻrashi va reparatsiyalar — qul savdosida ishtirok etgan davlatlar tomonidan toʻlanadigan tovon puli haqidagi savollarga javob berishi boʻyicha yangi talablarga duch kelishi kutilmoqda.
Qirol va qirolicha Kamilla 27 oktyabrdan boshlanadigan sakkiz kunlik tur davomida Hamdoʻstlik davlatlari rahbarlarining uchrashuvi uchun Antigua va Barbudaga tashrif buyurishi, shuningdek, Bagama orollari va Gayanada toʻxtab oʻtishi rejalashtirilgan.
PA axborot agentligining xabar berishicha, hukumat Qirolga uzr soʻrashni yoki reparatsiya taklif qilishni tavsiya etmagan.
Qirol bundan avval Buyuk Britaniyaning qulchilikdagi roli uchun «shaxsiy qaygʻusi»ni bildirgan edi.
Saroy matbuot kotibi shunday dedi: «Turli forumlarda mustamlakachilik merosi va transatlantik qul savdosining avlodlararo taʼsiri haqida muhim muhokamalar boʻlib oʻtmoqda.
Bular birinchi navbatda hukumatlar hal qilishi kerak boʻlgan masalalar boʻlsa-da, Janobi Oliylarining bu boradagi avvalgi bayonotlari aniq va ravshan boʻlib, ularni «tariximizni abadiy bulgʻovchi vahshiylik» deb atagan».
Saroyning maʼlum qilishicha, tashrif «asosan har bir mamlakatning joʻshqin buguni va istiqbolli kelajagiga qaratiladi».
Bir qator Afrika va Karib havzasi mamlakatlari transatlantik qul savdosidan foyda koʻrgan davlatlardan rasmiy uzr soʻrashni va reparatsiya toʻlashni talab qilmoqda.
Sentyabr oyida Yamayka hukumati mamlakat rahbari hisoblangan Qirolga qulchilik uchun reparatsiyalar boʻyicha petitsiya taqdim etishini maʼlum qilgan edi.
Madaniyat vaziri Oliviya Granjning aytishicha, petitsiyada Qiroldan Yamaykada afrikaliklarning qul qilinishi qonuniyligi boʻyicha Maxfiy kengashning Sud qoʻmitasiga uchta savol yoʻllash soʻraladi.
Oʻtgan oy Dauning-strit matbuot kotibi transatlantik qul savdosi «jirkanch» boʻlganini, biroq Buyuk Britaniyaning pozitsiyasi reparatsiya toʻlamaslikdan iborat ekanini bildirgan edi.