Qirgʻizistonda oʻtov shaklidagi «Bishkek Arena» stadioni qurildi
Bishkek shahrida 51 mingdan ortiq tomoshabinga moʻljallangan yangi koʻp funksiyali «Bishkek Arena» stadioni qurilishi yakunlandi. Qiymati 386 million dollar boʻlgan sport majmuasi foydalanishga topshirildi va ilk yirik xalqaro tadbirni qabul qildi.
Qirgʻizistonda oʻtov ko‘rinishidagi «Bishkek Arena» stadioni bunyod etildi
Yangi arena 51 252 tomoshabinni sig‘dira oladi va futbol uchrashuvlari hamda boshqa yirik sport musobaqalarini o‘tkazish bo‘yicha xalqaro talablarga mos ravishda qurilgan. Sakkiz qavatli bino an’anaviy qirg‘iz oʻtovi shaklida barpo etilgan.
Inshootning diametri 280 metr, balandligi esa 70 metrni tashkil qiladi. Majmuaning umumiy maydoni 194,2 ming kvadrat metrga teng.
Majmuada stadionning o‘zidan tashqari, rivojlangan savdo va ko‘ngilochar infratuzilma ham nazarda tutilgan. Bu yerda 23 ta restoran, 11 ta kafe, savdo markazi, supermarket, 48 ta do‘kon, 18 ta kiosk, to‘rtta kinoteatr, sport zali, bolalar maydonchasi va ayvonlar joylashgan. Tijorat obyektlari uchun qariyb 36 ming kvadrat metr maydon ajratilgan.
Mazkur obyektlar daromad keltirib, davlat byudjetiga qo‘shimcha yuk tushirmasdan, stadionni saqlash xarajatlarini qoplashga xizmat qilishi kutilmoqda.
Avvaliga Bishkekda 30–35 ming tomoshabinga mo‘ljallangan ixchamroq stadion qurish rejalashtirilgan edi. Ammo keyinchalik loyiha qayta ko‘rib chiqildi: sig‘imi 51 mingdan ortiq o‘ringa oshirildi, obyekt esa yirik ko‘p funksiyali sport majmuasiga aylantirildi. Qurilishning yakuniy qiymati 386 million dollar bo‘ldi.
«Bishkek Arena» allaqachon yirik tadbirlarni qabul qila boshlagan. 31-avgust kuni yangi stadionda VI Butunjahon ko‘chmanchilar o‘yinlarining ochilish marosimi o‘tkazildi.