Qirgʻiziston chet elliklarni roʻyxatga olish qoidalarini yangiladi. Oʻzbekistonliklar uchun nima oʻzgaradi?
Qirgʻiziston chet elliklarni roʻyxatga olish qoidalarini qayta koʻrib chiqdi. Bu oʻzbekistonliklar uchun nimani anglatadi?
Qirgʻizistonda chet el fuqarolari va fuqaroligi boʻlmagan shaxslarni roʻyxatga olishning yangi tartibi tasdiqlandi. Yangiliklar Oʻzbekiston fuqarolariga ham tegishli boʻladi: endilikda roʻyxatdan oʻtishni ham shaxsan, ham Tashqi migratsiyani hisobga olish yagona tizimi (TMHYAT) orqali onlayn tarzda, jumladan, mobil ilova orqali rasmiylashtirish mumkin boʻladi.
Shu bilan birga, Oʻzbekiston fuqarolari uchun alohida boʻlish rejimi saqlanib qoladi. Qirgʻizistonda yashash huquqini beruvchi hujjatlarsiz oʻzbekistonliklar mamlakatda har 120 kunlik davr ichida jami 60 kungacha boʻlishlari mumkin.
Agar Oʻzbekiston fuqarosiga yashash joyi boʻyicha roʻyxatdan oʻtish kerak boʻlsa, uy-joyga qoʻyiladigan yangi talablar ham kuchga kiradi. Bitta uy yoki kvartirada 10 nafardan ortiq boʻlmagan chet ellikni roʻyxatga olishga ruxsat beriladi, bunda har bir kishiga kamida 12 kvadrat metr toʻgʻri kelishi kerak. Bu cheklov yaqin qarindoshlarga taalluqli emas.
Agar chet ellik bir nechta fuqarolikka ega boʻlsa, roʻyxatdan oʻtish faqat u Qirgʻizistonga kirib kelgan pasport boʻyicha rasmiylashtiriladi. Rasmiylar, shuningdek, roʻyxatdan oʻtmasdan boʻlishning turli muddatlari belgilangan 92 ta davlat roʻyxatini tasdiqladilar — mamlakatga qarab, bu muddat bir necha kundan uch oygachani tashkil etadi.
Oʻzbekistonliklar uchun yana bir muhim oʻzgarish bor. 30 iyul kuni Oʻzbekiston va Qirgʻiziston ikki davlat fuqarolarini chegarani kesib oʻtgandan keyingi dastlabki 15 kun davomida majburiy doimiy yoki vaqtinchalik roʻyxatdan oʻtishdan ozod qiluvchi bayonnomani imzoladilar.
2026 yilning dastlabki yetti oyida mamlakatga qariyb 2 million oʻzbekistonlik tashrif buyurdi.