Qashqadaryoda yangi gaz-kondensat koni ochildi
Qashqadaryoning Mirishkor tumanida kunlik boshlangʻich qazib olish hajmi 500 ming kub metr boʻlgan yangi «Patron» konidagi quduq foydalanishga topshirildi.
Qashqadaryoda yangi gaz-kondensat koni aniqlandi
Qashqadaryo viloyatining Mirishkor tumanida yangi «Patron» gaz-kondensat koni ochildi, u yerdagi 1-sonli qidiruv qudugʻi gaz quvuriga ulanib, 2026 yil 2 sentyabr kuni ishga tushirildi. Quduqdan dastlabki gaz qazib olish hajmi sutkasiga 500 ming kubometrni tashkil etmoqda. Bu haqda Oʻzbekiston Energetika vazirligi xabar beradi.
Energetika vazirligi, shuningdek, ijtimoiy tarmoqlarda Qashqadaryo viloyatining Qarshi tumanida goʻyoki gaz portlashi sodir boʻlgani haqida tarqalgan maʼlumotlarni rad etdi. Idoraning maʼlum qilishicha, tarqatilayotgan videoda portlash emas, balki yangi kondagi qidiruv qudugʻini sinash va ishga tushirish jarayoni aks etgan.
«Patron» maydonida birinchi qidiruv qudugʻini burgʻilash ishlari 2025 yilda Xitoyning «BGP» kompaniyasi tomonidan 3D seysmik tadqiqotlar oʻtkazilganidan keyin boshlangan edi. Burgʻilash ishlari yakunlanib, 3296 metrdan 3339 metrgacha boʻlgan chuqurlikdagi qatlamlarning mahsuldorligini sinash sanoat miqyosidagi tabiiy gaz mavjudligini koʻrsatdi.
Dastlabki hisob-kitoblarga koʻra, kon nisbatan kichik konlar sirasiga kiradi. Uning zaxiralari taxminan 2,5 milliard kubometr tabiiy gazga baholanmoqda.
Hozirgi vaqtda «O‘zLITIneftgaz» AJ mutaxassislari tomonidan gaz-dinamik va gaz-kondensat tadqiqotlari olib borilmoqda. Ular yangi quduqdan gaz qazib olishning haqiqiy koʻrsatkichlarini aniqlash uchun zarurdir.
Energetika vazirligi quduqni sinash pazitida ochiq olov paydo boʻlishi odatiy texnologik jarayon ekanligini alohida tushuntirib oʻtdi. Quduqning mahsuldorligi, bosimi va ishchi parametrlarini aniqlash uchun gaz maxsus qurilma orqali yoqib yuboriladi. Shu bois, idora maʼlumotlariga koʻra, videoda tasvirlangan jarayon portlash yoki avariyadan dalolat bermaydi.
Quduqni gaz quvuriga ulash va uni ishga tushirish 2 sentyabr kuni soat 06:00 da amalga oshirildi. Ishlar neft-gaz tarmogʻining harbiylashtirilgan qismi va «O‘zLITIneftgaz» AJ mutaxassislari ishtirokida olib borildi.
Energetika vazirligi maʼlumotlariga koʻra, ishlarni bajarishda sanoat va yongʻin xavfsizligi, mehnat muhofazasi talablari hamda ekologik normalarga rioya qilingan. Zarur tashkiliy va texnik chora-tadbirlar Favqulodda vaziyatlar vazirligi vakillari nazorati ostida koʻrilgan.
Video tarqalishi munosabati bilan Energetika vazirligi ijtimoiy tarmoqlar maʼmurlarini vaziyatni oldindan aniqlashtirmasdan, tekshirilmagan maʼlumotlarni eʼlon qilmaslikka chaqirdi. Idora, shuningdek, jamoatchilikni chalgʻituvchi yolgʻon maʼlumotlarni tarqatish amaldagi qonunchilikka muvofiq javobgarlikka sabab boʻlishi mumkinligini eslatib oʻtdi.
Vazirlik neft-gaz sohasidagi voqealar haqidagi maʼlumotlarni rasmiy manbalardan olishni tavsiya qildi.