Prokurorlar Nik Reyner ota-onasini oʻldirganlikda aybdor deb topilsa, unga nisbatan oʻlim jazosini talab qilmaydigan boʻldi
Los-Anjeles okrug prokurorining maʼlum qilishicha, prokurorlar bu qarorga «sinchkovlik bilan oʻtkazilgan tekshiruvdan» soʻng va Reynerlar oilasi yaqinlarining istaklarini inobatga olgan holda kelishgan.
Prokurorlar ota-onasi — Gollivud rejissyori Rob Rayner va uning rafiqasi Mishel Raynerni oʻldirishda ayblanayotgan Nik Rayner agar aybdor deb topilsa, unga nisbatan oʻlim jazosini talab qilmaydi.
Los-Anjeles okrug prokurori Natan Xochmanning maʼlum qilishicha, bunday qaror «sinchkovlik bilan oʻtkazilgan tahlildan soʻng» va Raynerlar oilasi yaqinlarining istaklarini inobatga olgan holda qabul qilingan.
«Biz Nik Raynerning aka-opalari bilan gaplashdik (va) ular oʻz fikrlarini juda aniq bildirishdi», — dedi Xochman chorshanba kuni boʻlib oʻtgan sud oldi eshituvidan oldin jurnalistlarga.
Prokurorlarning taʼkidlashicha, bu Nik Rayner aybdor deb topilgan taqdirda olishi mumkin boʻlgan eng ogʻir jazo shartli ravishda ozod qilish huquqisiz umrbod qamoq jazosi boʻlishini anglatadi.
Xochman, shuningdek, seshanba kuni sud jarayoni 2026 yilda boshlanmasligini aytdi.
Rob va Mishel Rayner oʻtgan yili Los-Anjelesdagi uyida pichoqlab oʻldirilgan holda topilgan edi. Xabarlarga koʻra, ularning jasadlarini 14 dekabr kuni qizlari Romi topgan.
Oʻsha paytda Los-Anjeles okrugi tibbiy eksperti er-xotin «koʻplab oʻtkir tigʻli jarohatlar» oqibatida vafot etganini maʼlum qilgandi.
Ularning kenja oʻgʻli, 33 yoshli Nik oʻsha kuni Los-Anjelesda hibsga olingan. U qotillik boʻyicha oʻz aybini tan olmagan.
78 yoshli Rob Rayner «Bu — Spinal Tap» (This Is Spinal Tap), «Malika kelin» (The Princess Bride), «Garri Sallini uchratganda» (When Harry Met Sally) va «Mening yonimda qol» (Stand By Me) kabi filmlarga rejissyorlik qilgan.
70 yoshli Mishel Singer Rayner aktrisa, fotosuratchi va prodyuser, shuningdek, «Reiner Light» fotoagentligi va prodyuserlik kompaniyasi asoschisi edi.