Prezident avtomobilning oʻzgartirilgan yurishini (probegini) yashirganlik uchun jarimalar toʻgʻrisidagi qonunni qaytardi

Prezident oʻzgartirilgan avtomobil probegini yashirganlik uchun jarimalar toʻgʻrisidagi qonunni qaytardi

Oʻzbekiston Prezidenti Shavkat Mirziyoyev Maʼmuriy javobgarlik toʻgʻrisidagi kodeksga (MJTK) oʻzgartish va qoʻshimchalar kiritish haqidagi qonunni parlamentga qaytardi. Bu haqda 15 sentyabr kuni Oliy Majlis Qonunchilik palatasi yigʻilishida deputat Gulshana Xudoyorova maʼlum qildi.

Qoʻmita maʼlumotlariga koʻra, hujjat Qonunchilik palatasi tomonidan 27 yanvarda qabul qilingan, soʻngra may oyida Senat tomonidan maʼqullanib, Prezident Administratsiyasiga yuborilgan edi. 8 sentyabr kuni davlat rahbari «bir qator kontseptual masalalar va eʼtirozlar»ni koʻrsatib, uni parlamentning har ikki palatasiga qaytardi.

Qonunda avtomobil xaridoriga odometr koʻrsatkichlari oʻzgartirilgani yoki odometrning oʻzi almashtirilgani haqida xabar bermaganlik uchun maʼmuriy javobgarlik joriy etilishi koʻzda tutilgan edi.

Buning uchun MJTKni yangi 178−2-modda bilan toʻldirish taklif etilgandi. Senatda ushbu norma avtomobil xaridorlarini probeg haqidagi notoʻgʻri maʼlumotlardan va mashina sotishdagi suiisteʼmolliklardan himoya qilishga qaratilgani taʼkidlangan edi.

Hujjat, shuningdek, transport vositasini boshqarish huquqidan yoki ov qilish huquqidan mahrum qilish muddatini qisqartirish tartibini ham oʻzgartirar edi.

Eʼtirozlardan biri hozirda Maʼmuriy javobgarlik toʻgʻrisidagi kodeksning yangi tahriri tayyorlanayotgani bilan bogʻliq.

Yigʻilishda taʼkidlanganidek, Prezidentning 2026 yil 7 maydagi F-30-sonli farmoyishiga muvofiq, tegishli vazirlik va idoralar mutaxassislari olimlar bilan birgalikda MJTKning yangi tahriri loyihasini ishlab chiqmoqda.

Unda alohida protsessual qismni ajratish rejalashtirilgan boʻlib, unda ishlarni koʻrib chiqishning har bir bosqichida yuritish normalari va tartibi batafsil bayon etiladi.

«Kodeksga ish yuritish tartibiga taalluqli takroriy oʻzgartirishlarni qisqa muddatda kiritish amaliyotning notoʻgʻri shakllanishiga, noaniqliklar va turlicha talqinlar paydo boʻlishiga olib kelishi mumkin», — dedi Xudoyorova eʼtirozlarga tayanib.

MJTKning yangi tahririni tayyorlash avgust oyida tasdiqlangan «Adliya — 2030» strategiyasida ham koʻzda tutilgan: Adliya vazirligiga Oliy sud va Bosh prokuratura bilan birgalikda loyihani 2027 yil 1 aprelgacha ishlab chiqish topshirilgan.

Qoʻmita qonunda koʻzda tutilgan avtomobillar odometrlari koʻrsatkichlari bilan bogʻliq javobgarlikka alohida toʻxtaldi.

Prezidentning eʼtirozlarida Germaniya, Polsha, Frantsiya, Kanada, Janubiy Koreya va boshqa davlatlar tajribasi keltirilgan.

«Xorijiy davlatlar tajribasidan kelib chiqib, xaridorni odometr koʻrsatkichlari notoʻgʻri ekanligi haqida xabardor qilmaganlik uchun emas, balki odometr koʻrsatkichlarini oʻzgartirish maqsadida unga tashqi taʼsir koʻrsatganlik uchun maʼmuriy javobgarlik belgilash maqsadga muvofiqligi qayd etilgan», — dedi qoʻmita vakili.

Boshqacha aytganda, eʼtiroz huquqbuzarlik tarkibiga yondashuvning oʻziga tegishli: javobgarlikni xaridorga koʻrsatkichlarning notoʻgʻriligi haqida keyinchalik xabar bermaslik bilan emas, balki bevosita odometr ishiga aralashish bilan bogʻlash taklif etilmoqda.

Qoʻmitada bildirilgan eʼtirozlarni qonun loyihasining dastlabki kontseptsiyasi doirasida bartaraf etish imkonsiz ekanligi maʼlum qilindi.

Shu munosabat bilan Korruptsiyaga qarshi kurashish va sud-huquq masalalari qoʻmitasi qonunni Qonunchilik palatasining qayta koʻrib chiqishidan olib tashlashni taklif qildi.

Qonunchilik palatasi spikeri Nuriddin Ismoilov vaziyatga izoh berdi.

«Qonun bizdan ham, Senatdan ham oʻtdi. Unda nimadir notoʻgʻri deb boʻlmaydi. Lekin hozir Maʼmuriy javobgarlik toʻgʻrisidagi kodeksning yangi tahriri tayyorlanmoqda. Bu masalalarni uning printsiplaridan kelib chiqib, u bilan birga koʻrib chiqish tavsiyasi berildi», — dedi u.

Deputatlar qonunni qayta koʻrib chiqishdan olib tashlash taklifini bir ovozdan qoʻllab-quvvatladilar.