Polshada bir hafta ichida maktabda sodir boʻlgan uchinchi pichoqli hujumda ayol uch kishini jarohatladi
Polsha politsiyasi ikki kun ichida sodir boʻlgan avvalgi ikkita hujumda farrosh ayol oʻldirilgani va yana bir necha kishi jarohatlanganidan keyin allaqachon maktablarga safarbar qilingan edi.
Polshada bir hafta ichida maktabda sodir boʻlgan uchinchi pichoqli hujumda ayol uch kishini yaraladi
Polshadagi maktablarda shu haftada sodir boʻlgan uchinchi pichoqli hujumda uch kishi jarohatlanganidan keyin bir ayol qoʻlga olindi.
Politsiya PAP va AP axborot agentliklariga 21 yoshli ayol poytaxt Varshavadagi taʼlim muassasasida 17 yoshli qizga hujum qilish uchun "xavfli buyum"dan foydalanganini maʼlum qildi.
Ushbu hodisa hafta boshida sodir boʻlgan, biri ayol farroshning oʻlimi bilan yakunlangan ikkita pichoqli hujumdan soʻng, minglab politsiya xodimlari Polsha boʻylab maktablarga yuborilganining ertasi kuni yuz berdi.
Varshava politsiyasi voizi soʻnggi hodisa avvalgi ikkita hujum bilan bogʻliq yoki bogʻliq emasligini tasdiqlay olmasliklarini aytdi.
Hokimiyat organlari mahalliy ommaviy axborot vositalariga shanba kuni jarohat olgan 17 yoshli qiz shifoxonaga yotqizilgani, ammo uning ahvoli hayoti uchun xavfli emasligini maʼlum qildi. Hujjat topshirishga kelgan 17 va 24 yoshli yana ikki ayol ham jarohat olgan, deb xabar beradi davlat axborot agentligi.
Politsiya mahalliy OAVga hujumda gumon qilinayotgan shaxs ushbu maktab oʻquvchisi ekanini va dastlabki xulosalar u uch nafar jabrlanuvchini tanimaganini koʻrsatayotganini aytdi.
7 va 8 oktyabr kunlari mamlakat boʻylab maktablarda sodir boʻlgan pichoqli hujumlardan soʻng Polshadagi maktablar xavfsizlik choralarini kuchaytirayotgan edi. Polsha politsiyasi butun mamlakat boʻylab maktablarga safarbar qilinganidan keyin 76 kishini hibsga olganini bildirdi.
"Polshalik bolalarning xavfsizligi va maktablarimizdagi tinchlik haqida gap ketganda, yon berishlarga oʻrin yoʻq", dedi Polsha Bosh vaziri Donald Tusk operatsiyadan oldin.
Mahalliy OAV politsiya voiziga tayanib xabar berishicha, rasmiylarda oʻtgan haftadagi hodisalar internetdagi «chellenj» bilan bogʻliq boʻlishi mumkinligini koʻrsatuvchi maʼlumotlar bor.
Toʻrtshanba kuni Polsha markazidagi Mazoviya provintsiyasidagi kasb-hunar maktabida 19 yoshli talaba hujum qilib, toʻqqiz kishini jarohatladi.
Bir kun oʻtib, Varshava shimolidagi Leshchidol-Novini qishlogʻida 15 yoshli oʻsmir boshlangʻich maktabga kirganidan soʻng 37 yoshli farrosh oʻldirildi.