Hindistonda tushligiga kir yuvish kukuni qo‘shib berilgan o‘quvchilar kasalxonaga tushib qoldi
Hindistonda tushlikka kir yuvish kukuni qo‘shib berilgan o‘quvchilar shifoxonaga yotqizildi.
Hindistonning Bihar shtatidagi davlat maktabida 30 dan ortiq o‘quvchi zaharlanishdan aziyat chekdi. Hukumatning bepul ovqatlantirish dasturi doirasida berilgan tushlikda tuz yetishmasligidan shikoyat qilgan bolalarga adashib kir yuvish kukuni berilgani ma’lum qilindi. Bu haqda The Independent xabar berdi.
Nalanda tumanidagi Parsa o‘rta maktabining kamida 34 nafar o‘quvchisi 18-avgust kuni oshqozonida kuyish hissi borligidan shikoyat qilgach, zudlik bilan kasalxonaga olib borildi. O‘quvchilarning so‘zlariga ko‘ra, tushlikka pishirilgan guruch, kartoshka va soyali sabzavotli karri berilgan.
"Ko‘pchilik o‘quvchilar ovqatni yegandan keyin hushini yo‘qotdi", dedi o‘quvchilardan biri jurnalistlarga.
Tushlikdan ko‘p o‘tmay, bir qancha o‘quvchilarning boshi aylana boshlagan va qayt qilgan. Maktab ma’muriyati ularga birinchi tibbiy yordam ko‘rsatgan. Bolalarning ahvoli yaxshilanmagach, ular yaqin atrofdagi kasalxonaga olib ketilgan.
Maktab direktori Shailendra Kumar Singhning ta’kidlashicha, oshxona xodimlari o‘quvchilar qo‘shimcha tuz so‘raganda adashib ularga kir yuvish kukunini berib yuborgan.
"Oshxonadagi uchta oshpazdan biri bolalarga ovqat tarqatayotgan edi. Bir nechta bola tuz so‘raganida, xodim adashib tuz o‘rniga kir yuvish kukunini uzatgan. Tushlik ovqati esa nodavlat tashkilot tomonidan yetkazib beriladi", dedi maktab direktori.
Xirurg Jay Prakash Singh o‘quvchilar kasalxonaga ovqatdan zaharlanish alomatlari bilan olib kelinganini aytdi.
"Barcha bolalarning salomatligi barqaror. Hammasi yaxshi bo‘lib ketadi", deya qo‘shimcha qildi u.
Bihar shtati vaziri Shravan Kumar kasalxonada o‘quvchilar holidan xabar olgach, bunday xatoga qanday yo‘l qo‘yilganini aniqlash uchun atroflicha tekshiruv o‘tkazilishini bildirdi. Bu Hindiston hukumatining maktablarda bepul ovqat berish dasturida yuz bergan navbatdagi noxush holatdir.
Dastur dunyodagi eng yirik bepul maktab taomlari loyihalaridan biri hisoblanadi. U bolalarning ovqatlanish darajasini yaxshilash, maktabga qatnashni oshirish va o‘qishni tashlab ketishni kamaytirish uchun davlat maktablarida bepul tushlik beradi. Loyiha doirasida butun mamlakat bo‘ylab bir milliondan ortiq maktabda 120 million bola pishirilgan ovqat bilan ta’minlanadi.
Shunga qaramay, buzilgan ovqatlar bilan bog‘liq holatlar uchrab turibdi. Yanvar oyida Telangana shtatida 20 dan ortiq o‘quvchi sifatsiz tushlik sabab kasal bo‘lib qolgan edi. 2025-yilda 100 dan ortiq bola o‘lik ilon tushib qolgan ovqatni yeganidan so‘ng betob bo‘lgan.