Polsha chegarasi yaqinida kuchli portlash yuz berdi
Ukrainaning Polsha bilan chegaradosh Volin viloyatida, Doroxusk–Yagodin chegara oʻtkazish punkti yaqinida yana dron zarbasi qayd etildi. Polsha harbiylari maʼlumotiga koʻra, reaktiv dvigatelli dron Polsha chegarasidan taxminan 4 kilometr masofada nishonga urilgan yoki urib tushirilgan. Hujum paytida Polsha qiruvchi samolyotlarni havoga koʻtardi.
Polsha chegarasi yaqinida kuchli portlash qayd etildi
Polsha bosh vaziri Donald Tusk 17-sentabr kuni Ukraina hududida, Polsha chegarasiga juda yaqin joyda yana bir kuchli portlash yuz berganini bildirdi.
Uning aytishicha, hodisa Doroxusk chegara punkti yaqinida sodir bo‘lgan va ehtimol, yoqilg‘i quyish shoxobchasi nishonga olingan.
Tusk portlash juda kuchli bo‘lganini ta’kidladi. Hujum sabab Polsha harbiy aviatsiyasi qiruvchi samolyotlarni havoga ko‘targan.
Polsha Qurolli kuchlari operativ qo‘mondonligi ma’lumotiga ko‘ra, gap reaktiv dvigatelli uchuvchisiz uchish apparati haqida ketmoqda. Dron Ukraina hududida, Polsha–Ukraina chegarasidan taxminan 4 kilometr uzoqlikda nishonga urilgan yoki havo hujumidan mudofaa vositalari tomonidan urib tushirilgan bo‘lishi mumkin.
Ukraina Davlat chegara xizmati chegara o‘tkazish punktining o‘zi hujum oqibatida zarar ko‘rmaganini ma’lum qildi.
Hujum fonida Polshaning Lyublin va Karpatosti voyevodaliklari aholisi hukumat xavfsizlik markazidan ogohlantiruv xabarlarini olgan. Lyublin va Jeshuv aeroportlari esa parvozlarni vaqtincha to‘xtatgan.
O‘sha kuni Polsha parlamentida chiqish qilgan Donald Tusk razvedka ma’lumotlariga tayangan holda, Rossiya Ukrainaga yordam ko‘rsatayotgan davlatlarga, jumladan Polshaga qarshi dron va raketalardan foydalangan holda «gibrid hujumlar» rejalashtirayotgan bo‘lishi mumkinligini aytdi.
Biroq Tusk bu ma’lumotni aynan qaysi razvedka xizmatlari taqdim etganiga aniqlik kiritmagan.
Polsha bosh vaziri yangi hujum 1939-yil 17-sentabrda Sovet Ittifoqi Polshaga bostirib kirganining 87 yilligiga to‘g‘ri kelganiga ham e’tibor qaratdi.
Polsha mudofaa vaziri Vladislav Kosinyak-Kamish esa Rossiyani Ukrainaga qarshi urushni kuchaytirishda ayblab, Moskva «tajovuzkor harakatlarini to‘xtatmayotganini» bildirdi.
DW ma’lumotiga ko‘ra, bu Doroxusk–Yagodin chegara o‘tkazish punktiga bevosita yaqin hududda bir hafta ichida sodir bo‘lgan ikkinchi shunday zarbadir.