Pokiston Eronni husiylarni tiyib qo‘yish haqida ogohlantirdi

Pokiston Eronga husiylarni jilovlash borasida ogohlantirish yubordi

Pokiston Saudiya Arabistonining ogohlantirishini Eronga yetkazdi. Ar-Riyod Tehrondan Yaman husiylarini jilovlashni so‘ramoqda. Saudiya, Pokiston va Eron manbalariga ko‘ra, bu qadam inqiroz yanada kuchayib ketishining oldini olish uchun ko‘rilmoqda, deb xabar berdi Reuters.

Husiylar 8-sentyabr kuni Xamis Mushayt shahridagi harbiy havo bazasi va yaqin atrofdagi shaharlardagi neft obyektlariga zarba berdi. Natijada 73 kishi yaralandi. Bu fevral oyida AQSH va Isroilning Eronga qarshi urushi boshlanganidan beri Saudiya Arabistoniga qilingan eng yirik hujumlardan biri bo‘ldi.

Husiylarning harbiy matbuot kotibi Yahyo Sariy 9-sentyabr kuni bayonot berdi. Uning aytishicha, Saudiya harbiy samolyotlari so‘nggi 12 soat ichida Yamanning turli viloyatlariga 54 marta aviazarba bergan. Sariy bu hujumlar javobsiz va jazosiz qolmasligini bildirdi.

Kuchayib borayotgan nizo sabab Yaqin Sharqda dunyo energiya ta’minotiga tahdid soluvchi ikkinchi urush o‘chog‘i yuzaga kelmoqda. Shu bilan birga, Eron va AQSH Fors ko‘rfazida harbiy to‘qnashuvlarni davom ettirmoqda. Pokistonning Eronga bergan ogohlantirishi katta ahamiyatga ega, chunki mamlakatning Saudiya va Turkiya bilan mudofaa shartnomasi mavjud.

Islomobod rasmiylari har qanday harbiy rol faqat Saudiya hududini himoya qilish bilan cheklanishini ta’kidladi. Biroq Pokiston Mudofaa vaziri Xavoja Asif hujumlar qirollik hududiga o‘tsa, Ar-Riyod, Anqara va Islomobod o‘rtasidagi qo‘shma xavfsizlik bitimi ishga tushishini aytdi.

“Bir mamlakatga qilingan tajovuz har uchala davlatga qilingan tajovuz deb hisoblanadi. Bu yerda hech qanday chalkashlik yoki shubha yo‘q. Saudiyada sababsiz tajovuz yoki nizo yuzaga kelishi ushbu bitimni albatta amalda kuchga kirgizadi”, dedi Asif Pokiston televideniyesida.

Pokiston Mudofaa vazirligi, Tashqi ishlar vazirligi va harbiylari Reuters agentligining bu boradagi so‘roviga izoh bermadi.

Pokiston yillar davomida Saudiya Arabistoni va Eron bilan munosabatlarni muvozanatda ushlab kelgan edi. Uning vaziyatga aralashuvi husiylar hujumi qanchalik jiddiy ekanini ko‘rsatmoqda.

“Manbalarga ko‘ra, Tehronga berilgan xabar aniq: husiylarni to‘xtating, aks holda bilvosita nizo kengroq mintaqaviy xavfsizlik inqiroziga aylanadi”, deyiladi xabarda.

Mintaqaviy yuqori martabali diplomatning aytishicha, Pokiston bu xabarni Eronga so‘nggi 24 soat ichida yetkazgan. Islomobod Tehrondan husiylarning Saudiya Arabistoniga hujumlarini to‘xtatish uchun o‘z ta’siridan foydalanishni so‘ragan.

Eronning yuqori martabali rasmiysi Pokiston seshanba kuni Tehronga ushbu xabarni yetkazganini tasdiqladi. Tehrondan esa “Eron husiylarni nazorat qilmaydi” degan javob berilgan.

Biroq Eronning ikkita manbasi boshqacha ma’lumot berdi. Ularning aytishicha, Tehron o‘tgan haftada husiylarga Saudiya Arabistoniga hujum qilishni buyurgan. Tehron ularga qo‘shimcha mablag‘ va qurol va’da qilgan. Islom inqilobi qo‘riqchilari korpusining bir necha qo‘mondoni hujumlarni muvofiqlashtirishga yordam berish uchun Yamanga borgan.

Diplomatning bildirishicha, Islomobod vaziyat keskinlashib, Ar-Riyod Pokistondan faolroq harbiy yordam so‘raydigan darajaga yetmasidan oldin husiylarni to‘xtatishga urinmoqda.

“Pokistonning Saudiya Arabistoni bilan bitimi bor. Lekin vaziyat Pokiston amalda aralashishga majbur bo‘ladigan darajaga yetmaydi degan umiddaman. Hozircha diplomatiya yo‘li qo‘llanadi”, dedi diplomat Reuters’ga.

Pokistonlik manbaning aytishicha, Saudiya rasmiylari javob choralarini muvofiqlashtirish uchun Ar-Riyodda Pokiston va Turkiya harbiy vakillari bilan uchrashgan. Uch mamlakat o‘z qo‘shinlarini Yamanga kiritmaslikka va har qanday javob zarbasi faqat Saudiya hududidan berilishiga kelishib olgan.

Ikkinchi pokistonlik manba javob zarbalariga qo‘shilish bo‘yicha hech qanday qaror qabul qilinmaganini aytdi. U Ar-Riyod bilan mudofaa bitimi faqat Saudiya hududini himoya qilish bilan cheklanishini ta’kidladi. Pokiston kuchlari Saudiya ichida harbiy, texnik, quruqlikdagi yoki havodagi yordamni ko‘rsatishi mumkin. Lekin ular xorijiy hududdagi jangovar operatsiyalarda qatnashmaydi.

Mintaqaviy diplomatning qo‘shimcha qilishicha, Eron va husiylar olib borayotgan bosim kampaniyasi Tehron kutganiga teskari natija berishi mumkin.

Tehron Vashingtonga Eron portlari qamaliga nisbatan bosim o‘tkazish uchun Fors ko‘rfazi xavfsizligini nishonga olmoqda. Biroq bu harakat Saudiya, Pokiston, Turkiya va AQSHga ittifoqchi boshqa davlatlar o‘rtasidagi aloqalarni uzish o‘rniga, ularni o‘zaro xavfsizlik bo‘yicha yanada yaqinroq hamkorlik qilishga majbur qilmoqda.