Parvozim bekor qilinsa yoki kechiktirilsa, qanday huquqlarga ega boʻlaman?
Parvozlar havo harakatini boshqarish tizimidagi muammolar tufayli bekor qilinmoqda, agar siz bundan jabr koʻrgan boʻlsangiz, qanday huquqlarga egasiz?
Parvozim bekor qilinsa yoki kechiktirilsa, qanday huquqlarga ega boʻlaman?
Buyuk Britaniya boʻylab havo harakatini boshqarish tizimidagi muammo tufayli 2000 ga yaqin reys toʻxtatilganidan keyin minglab aviayoʻlovchilarning sayohat rejalari barbod boʻldi.
Parvoz bekor qilinganda yoki kechiktirilganda, jabrlangan yoʻlovchilar bir nechta huquqlarga ega boʻladi, jumladan, pul mablagʻlarini qaytarib olish yoki boshqa reysga joylashtirilish. Ammo bu huquqlar aviakompaniya va joʻnab ketish nuqtasiga qarab farq qilishi mumkin.
Qoʻshimcha kompensatsiya faqat aviakompaniya aybdor boʻlgan taqdirdagina toʻlanadi, havo harakatini boshqarish tizimidagi muammolar kabi holatlar uchun esa toʻlanmaydi. Bu siz uchun nimani anglatishi quyida tushuntiriladi.
Parvozlar kechiktirilganda yoki bekor qilinganda, Buyuk Britaniya va IA (Yevropa Ittifoqi) aviakompaniyalari, shuningdek, Buyuk Britaniya yoki IA aeroportidan joʻnab ketayotganingizda boshqa tashuvchilar sizga gʻamxoʻrlik qilish majburiyatiga ega.
Kechikish yoki bekor qilinish sababi ahamiyatga ega emas. Shuning uchun havo transportidagi uzilishlardan jabrlangan har bir kishi bunga haqli boʻladi.
Bunga zarur hollarda oziq-ovqat va turar joy bilan taʼminlash, shuningdek, sizni manzilingizga yetkazish kiradi. Aviakompaniya siz uchun hech qanday qoʻshimcha xarajatlarsiz muqobil reys tashkil qilishi kerak.
Foydalanilmagan turar joy kabi qoʻshimcha yoʻqotishlar, agar toʻlov usuli sifatida kredit kartasidan foydalanilgan boʻlsa, kredit karta provayderidan talab qilinishi mumkin.
Shundan soʻng, sayohat sugʻurtasi provayderingizga daʼvo arizasi bilan murojaat qilish kerak boʻlishi mumkin. Ammo nimalar sugʻurta bilan qoplanishi boʻyicha yagona standart taʼrif mavjud emas.
Nimalar va qanday sharoitlarda qoplanishini bilish uchun polis tafsilotlarini diqqat bilan oʻrganib chiqish talab etilishi mumkin.
Yoʻlovchilar, shuningdek, Buyuk Britaniya hukumatining sayohat boʻyicha tavsiyalariga amal qilishga chaqirilmoqda.
Agar parvozingiz Buyuk Britaniya qonunchiligi bilan himoyalangan boʻlsa, aviakompaniyangiz sizga pulni qaytarib olish yoki muqobil reysga qayta band qilish (bron qilish) oʻrtasida tanlov imkoniyatini berishi kerak.
Bu bekor qilish qancha vaqt oldin eʼlon qilinganidan qatʼi nazar amal qiladi.
Chiptaning ishlatilmagan har qanday qismi uchun pulni qaytarib olishingiz mumkin.
Shunday qilib, agar siz borish-kelish chiptasini band qilgan boʻlsangiz va borish reysi bekor qilinsa, siz borish-kelish chiptasining toʻliq qiymatini qaytarib olishingiz mumkin.
Agar siz baribir sayohat qilmoqchi boʻlsangiz, aviakompaniyangiz sizga muqobil reys topishi kerak.
Agar boshqa aviakompaniya sizning manzilingizga sezilarli darajada tezroq uchayotgan boʻlsa yoki boshqa mos transport turlari mavjud boʻlsa, unda siz ushbu muqobil transportga band qilinish huquqiga egasiz.
Agar parvozingiz Buyuk Britaniyaga Buyuk Britaniya yoki IAga tegishli boʻlmagan aviakompaniyada amalga oshirilayotgan boʻlsa, band qilish shartlari va qoidalarini tekshirishingiz kerak.
Agar siz parvoz bekor qilingani sababli chet elda yoki aeroportda qolib ketgan boʻlsangiz, Buyuk Britaniya qonunchiligi bilan himoyalangan aviakompaniyalar boshqa yordamlarni ham koʻrsatishi kerak.
Bunga quyidagilar kiradi: oqilona miqdordagi oziq-ovqat va ichimliklar, koʻpincha vaucherlar shaklida; aloqa oʻrnatishingiz uchun imkoniyat, koʻpincha qoʻngʻiroq xarajatlarini qoplash orqali; agar keyingi kuni uchish uchun tunab qolishingiz kerak boʻlsa, bepul turar joy; turar joygacha va undan orqaga transport.
Agar aviakompaniyangiz yordam tashkil qila olmasa, siz uni oʻzingiz tashkil qilish va keyinchalik xarajatlarni qaytarib olishni talab qilish huquqiga egasiz.
Fuqarolik aviatsiyasi boshqarmasi odamlarga kvitantsiyalarni saqlab qolishni va keragidan ortiq pul sarflamaslikni tavsiya qiladi.
Agar parvozingiz qisqa masofali reysda ikki soatdan koʻproq, oʻrta masofali reysda uch soatdan koʻproq yoki uzoq masofali reysda toʻrt soatdan koʻproq kechiktirilsa, siz xuddi parvoz bekor qilingandagidek yordam olish huquqiga egasiz.
Agar siz besh soatdan koʻproq vaqtga kechiksangiz va endi sayohat qilishni xohlamasangiz, pulni toʻliq qaytarib olishingiz mumkin.
Agar siz ABTA aʼzosi boʻlgan kompaniyadan paketli tur sotib olgan boʻlsangiz va parvozingiz bekor qilinsa, siz mos keluvchi muqobil reysga yoki pulni toʻliq qaytarib olishga haqlisiz.
Havo harakatini boshqarish muammolari, shuningdek, noqulay ob-havo, aeroport xodimlarining ish tashlashlari, mojarolar yoki boshqa "favqulodda holatlar" tufayli yuzaga kelgan uzilishlar sizga qoʻshimcha kompensatsiya olish huquqini bermaydi.
Biroq, boshqa vaziyatlarda, bu aviakompaniyaning aybi deb topilganda, siz Buyuk Britaniya qonunchiligiga koʻra bir qator huquqlarga ega boʻlasiz.
Bular Buyuk Britaniya aeroportidan istalgan aviakompaniyada uchayotganingizda, IA yoki Buyuk Britaniya aviakompaniyasida Buyuk Britaniya aeroportiga qoʻnayotganingizda yoki Buyuk Britaniya aviakompaniyasida IAdagi aeroportga qoʻnayotganingizda amal qiladi.
Siz nimaga haqli ekanligingiz bekor qilinishga nima sabab boʻlganiga va sizga qancha vaqt oldin xabar berilganiga bogʻliq.
Agar parvozingiz ikki haftadan kamroq vaqt qolganda bekor qilinsa, sizga taklif qilinayotgan muqobil reys vaqtiga qarab kompensatsiya talab qilishingiz mumkin.
Siz talab qilishingiz mumkin boʻlgan summa, shuningdek, siz sayohat qilayotgan masofaga bogʻliq: 1500 km dan kam boʻlgan parvozlar uchun, masalan, Glazgodan Amsterdamga, bir kishi uchun 220 funt sterlinggacha; 1500 km dan 3500 km gacha boʻlgan parvozlar uchun, masalan, Ist-Midlendsdan Marrakeshga, bir kishi uchun 350 funt sterlinggacha; 3500 km dan ortiq parvozlar uchun, masalan, Londondan Nyu-Yorkka, bir kishi uchun 520 funt sterlinggacha talab qilishingiz mumkin.
Aviakompaniyalar boy berilgan daromadni qoplamaydi. Sayohat sugʻurtasi polislari ham odatda boy berilgan daromadni qoplamaydi.
Agar siz parvozlar kechikishi sababli ishga kech qolaman deb oʻylasangiz, huquqshunoslarning taʼkidlashicha, bu haqda ish beruvchingizni xabardor qilish sizning masʼuliyatingizdir.
Ish beruvchingiz bilan ishda boʻlmaslikni qanday hal qilishni kelishib olishingiz kerak, masalan, yillik taʼtildan foydalanish yoki ish haqi saqlanmaydigan taʼtil olish orqali.
Mutaxassislarning taʼkidlashicha, agar shartnomada boshqacha koʻrsatilmagan boʻlsa, ish beruvchilar bunday vaziyatda ishda boʻlmagan xodimlarga haq toʻlashga qonuniy jihatdan majbur emas.