OʻzLiDeP koʻmagi bilan Urganchda aholi uchun koʻchma tibbiy koʻriklar tashkil etildi
Urganch shahri chekka mahallalarida OʻzLiDeP tashabbusi bilan aholiga koʻchma tibbiy koʻriklar (UZI, rentgen, oftalmologiya) uyushtirildi. 300 dan ortiq fuqaro tekshirilib, 25 nafarga davolash boʻyicha tavsiya berilgan. Ushbu ishlar «Xalq bilan birga» dasturi doirasida kasalliklarni erta aniqlashga xizmat qiladi.
OʻzLiDeP koʻmagida Urganchda aholi uchun koʻchma tibbiy koʻriklar oʻtkazildi
Aksiyaning eng muhim jihati shundaki, zamonaviy tibbiy xizmatlar uchun aholi izlab borishi shart bo‘lmadi, aksincha, tibbiy koʻriklarning oʻzi odamlarga yaqinlashtirildi. Maxsus tibbiy transport vositalari yordamida Binokor, Jambul va Saxovat mahallalari aholisi uchun UZI, rentgen va oftalmologiya yoʻnalishlarida bepul koʻriklar tashkil etildi.
Koʻriklarda 300 dan ortiq fuqaro qatnashdi. Tekshiruvlar yakuniga koʻra, 8 nafar fuqaroga statsionar davolanish, 17 nafar ishtirokchiga esa ambulator davolanish boʻyicha tavsiyalar berildi. Bu aksiya oddiy tibbiy koʻrik emas, balki kasalliklarni erta aniqlash va insonlarni oʻz vaqtida davolanishga yoʻnaltirishga xizmat qilayotganini ko‘rsatadi.
Eng asosiysi, bunday tashabbuslar faqat shahar markazi bilan cheklanib qolmayapti. Koʻchma tibbiy avtobuslar orqali tibbiy xizmatlar chekka mahallalargacha yetib bormoqda. OʻzliDePning «Xalq bilan birga» dasturi doirasidagi ana shunday amaliy ishlar aholi salomatligiga eʼtiborni yanada kuchaytirishga xizmat qiladi.