Oʻzbekistonda yangi shamol va quyosh elektr stansiyalari quriladi

Oʻzbekistonda yangi shamol va quyosh elektr stansiyalari barpo etiladi

Oʻzbekistonda yangi shamol energetikasi loyihalarini Qoraqalpogʻiston Respublikasi, Navoiy, Buxoro, Jizzax va Samarqand viloyatlarida amalga oshirish rejalashtirilmoqda.

Xabarda aytilishicha, 2030-yilga qadar shamol elektr stansiyalarining quvvatini 12 ming MVtga, quyosh elektr stansiyalarining oʻrnatilgan quvvatini esa kamida 7 ming MVtga yetkazish moʻljallanmoqda.

Shuningdek, barcha hududlarda elektr energiyasini saqlash tizimlarini yaratish ham rejalashtirilgan. Ularning parametrlari va ishlash rejimlari hududlardagi energiya isteʼmoli xususiyatlari hamda yirik sanoat korxonalarining ehtiyojlariga moslashtiriladi.

Energetika vazirligiga investorlar bilan muzokaralarni tezlashtirish va belgilangan muddatlardan ortda qolayotgan loyihalar yuzasidan zarur choralarni koʻrish topshirilgan. Investorlar shaffof tanlov jarayonlari asosida saralanadi.

Vazirlik maʼlumotiga koʻra, 2025-yilda Oʻzbekistondagi elektr stansiyalarining jami oʻrnatilgan quvvati 24,7 ming MVtni tashkil etgan. Shundan quyosh va shamol elektr stansiyalari quvvati 6,3 ming MVtdan oshgan, gidroelektrostansiyalar quvvati esa qariyb 2,5 ming MVt boʻlgan.