Oʻzbekistonda suyultirilgan gaz bozoriga oʻtish boshlanadi

Oʻzbekistonda aholini suyultirilgan gaz bilan taʼminlashni bosqichma-bosqich bozor tamoyillariga oʻtkazish rejalashtirilmoqda. Pilot loyihani Andijon viloyatida ishga tushirish koʻzda tutilgan, deb xabar berdi energetika vaziri Sherzod Xoʻjayev «Oʻzbekiston 24» telekanaliga bergan intervyusida.

Loyiha doirasida aholiga suyultirilgan gazni erkin narxlarda nafaqat «Hududgaztaʼminot», balki kamida ikkita xususiy tadbirkor ham sotishi mumkin boʻladi. Vazirning soʻzlariga koʻra, xususiy sektorning ishtiroki raqobat muhitini yaratishi va xizmat koʻrsatish sifatini yaxshilashi kerak.

Hukumat belgilangan meʼyordan ortiq gazga ehtiyoj tugʻilganda, fuqarolar va tadbirkorlar ballonlarni avtomobillarga gaz quyish shoxobchalarida mustaqil ravishda toʻldirib, soʻngra ularni shaxsiy avtomobillarida tashishi bilan bogʻliq vaziyatni muammolardan biri deb hisoblaydi. Xoʻjayev bunday usulni noqonuniy, notoʻgʻri va xavfli deb atadi.

Shu munosabat bilan bevosita mahallalarda suyultirilgan gaz ballonlarini sotish shoxobchalarini tashkil etish varianti koʻrib chiqilmoqda. Shu bilan birga, bunday obʼyektlarga qoʻyiladigan texnik talablarni qayta koʻrib chiqish rejalashtirilgan.

Isteʼmolchilar uchun mobil ilova joriy etish moʻljallanmoqda. U orqali kerakli hajmdagi gazni buyurtma qilish va uyga yetkazib berish uchun qulay vaqtni tanlash mumkin boʻladi.

Hozirda «Hududgaztaʼminot» sigʻimi 20 kg boʻlgan bir turdagi ballonlardan foydalanmoqda. Xususiy operatorlarga suyultirilgan gazni amaldagi cheklovlarsiz, boshqa hajmdagi ballonlarda sotishga ruxsat berish rejalashtirilmoqda.

Oʻzgarishlar import qiluvchilarga ham daxldor boʻladi. Suyultirilgan gazni olib kiruvchi tadbirkorlar aholiga zarur hajmni sotgandan soʻng, qolgan yoqilgʻini birja orqali cheklovlarsiz sotishlari mumkin boʻladi.

Iqtisodiyot va moliya vazirining neft-gaz sohasi boʻyicha oʻrinbosari Xurshed Mustafoyev «Hududgaztaʼminot» tarkibida alohida LPG-Trade korxonasi tashkil etilishini maʼlum qildi. U aholini suyultirilgan gaz bilan taʼminlash bilan shugʻullanadi.

Bundan tashqari, kuz-qish davrida barqaror ishlashni taʼminlash uchun «Hududgaztaʼminot»ni moddiy qoʻllab-quvvatlash choralari koʻzda tutilgan. Shu bilan birga, suyultirilgan gaz import qiluvchilar uchun amaldagi qonunchilikda nazarda tutilgan ayrim birja imtiyozlarini bekor qilish rejalashtirilmoqda.

Mustafoyevning soʻzlariga koʻra, ushbu chora-tadbirlar majmui kuz-qish davrida aholini suyultirilgan gaz bilan uzluksiz taʼminlashni kafolatlashi lozim.

Hozirda 3,8 mln ga yaqin isteʼmolchi va 2 mingga yaqin ijtimoiy soha obʼyekti suyultirilgan gaz bilan taʼminlanmoqda. 2026 yilda ularga 604,8 ming tonna yoqilgʻi yetkazib berish koʻzda tutilgan.

Shu bilan birga, isteʼmolchilarning 22 foizi suyultirilgan gazni 46 kundan ortiq oraliq bilan olmoqda. Kechikishlar sababli oilalarning bir qismi gazni avtomobillarga gaz quyish shoxobchalaridan bozor narxlarida sotib olishga majbur boʻlmoqda. Natijada bunday isteʼmolchilarning xarajatlari belgilangan narxdan bir necha barobar yuqori boʻlishi mumkin, deb taʼkidlandi prezident huzuridagi yigʻilishda.