Oʻzbekistonda har 100 ta xonadonga 124 ta muzlatgich toʻgʻri kelmoqda

Oʻzbekistonda har 100 ta xonadonga 124 ta muzlatgich toʻgʻri keladi

Oʻzbekiston Respublikasi Milliy statistika qoʻmitasining uy xoʻjaliklari tanlama kuzatuvi maʼlumotlariga koʻra, 2026 yil 1 yanvar holatiga koʻra, Oʻzbekistonda har 100 ta xonadonga oʻrtacha 124 ta muzlatgich va muzlatish kamerasi toʻgʻri kelgan.

Bu koʻrsatkich soʻnggi oʻn yilliklarda keskin oshdi. 2000 yilga nisbatan har 100 ta xonadonga toʻgʻri keladigan muzlatgich va muzlatish kameralari soni 44,2 foizga oshgan.

2000 yilda bu koʻrsatkich har 100 ta xonadonga oʻrtacha 86 ta muzlatgich va muzlatish kamerasini tashkil etgan boʻlsa, 2005 yilda 91 taga, 2010 yilda esa 99 taga yetdi.

2015 yilga kelib, ushbu roʻzgʻor buyumlari soni 100 tadan oshib, har 100 ta xonadonga 101 ta muzlatgich yoki muzlatish kamerasi toʻgʻri keldi.

Shundan soʻng, 2020 yilda bu koʻrsatkich 107 taga yetdi. Keyingi yillarda ham oʻsish davom etib, umumiy soni 2021 yilda 114 tani, 2022 yilda 115 tani va 2023 yilda 118 tani tashkil etdi.

2024 yilda har 100 ta xonadonga toʻgʻri keladigan muzlatgich yoki muzlatish kameralari soni 121 taga yetdi. 2025 yil oxiriga kelib esa bu koʻrsatkich 124 taga koʻtarildi.

Umuman olganda, maʼlumotlar uy xoʻjaliklarining muzlatgich va muzlatish kameralari bilan taʼminlanganlik darajasi barqaror ravishda oshib borayotganini koʻrsatadi — bu koʻrsatkich 2000 yildagi har 100 ta xonadonga 86 tadan 2026 yil boshida 124 tagacha yetdi.