Oʻzbekiston va Parlamentlararo ittifoq hamkorlikning yangi yoʻnalishlarini muhokama qildi
Tanzila Narbayeva va Parlamentlararo ittifoq bosh kotibi Anda Filip hamkorlikni rivojlantirish va yangi qoʻshma tashabbuslarni muhokama qildilar.
Oʻzbekiston va Parlamentlararo ittifoq hamkorlikning yangi yoʻnalishlarini muhokama qildi
Oʻzbekiston Oliy Majlisi Senati Raisi Tanzila Narbayeva Yosh parlament aʼzolarining XII global konferentsiyasi doirasida Parlamentlararo ittifoq bosh kotibi Anda Filip bilan uchrashdi.
Oliy Majlis Senati xabar berishicha, tomonlar hamkorlikning bugungi holati, erishilgan natijalar va hamkorlikning ustuvor yoʻnalishlarini koʻrib chiqdilar.
Anda Filip Oʻzbekistonning Parlamentlararo ittifoq bilan hamkorlikni rivojlantirishga qaratilgan tashabbuslarini yuqori baholadi.
Mamlakatning xalqaro parlamentlararo muloqotdagi faol ishtirokining muhim natijalari qatorida Buxoroda Barqaror rivojlanish maqsadlarini amalga oshirishda parlamentlararo hamkorlik boʻyicha Global forum, Toshkentda Dunyo parlamentlari ayol rahbarlarining sammiti, shuningdek, Samarqand va Buxoroda Osiyo xotin-qizlar forumlari oʻtkazilgani qayd etildi.
2025 yil aprel oyida Toshkentda boʻlib oʻtgan Parlamentlararo ittifoqning 150-yubiley Assambleyasi alohida taʼkidlandi. Ushbu tadbir tashkilotning Markaziy Osiyodagi ilk shunday yigʻilishi boʻldi.
Uchrashuvda, shuningdek, Oʻzbekiston tashabbusi bilan qabul qilingan hamda xalqaro va global jarayonlarda parlamentlar rolini kuchaytirishga qaratilgan BMT Bosh Assambleyasi rezolyutsiyalarining ahamiyati taʼkidlandi. Ushbu tashabbuslar mamlakat parlament diplomatiyasining muhim yoʻnalishlaridan biri sifatida eʼtirof etildi.
Tomonlar Parlamentlararo ittifoqning yangi Strategiyasi doirasida hamkorlikni yanada rivojlantirishga alohida eʼtibor qaratdilar.
Uchrashuv ishtirokchilari parlamentlararo aloqalarni mustahkamlash, tajriba almashishni kengaytirish, yangi qoʻshma tashabbuslarni ilgari surish va amaliy loyihalarni hayotga tatbiq etish masalalari boʻyicha fikr almashdilar.