Oʻzbekiston propan importini keskin koʻpaytirdi
**Oʻzbekiston propan importini keskin oshirdi**
Oʻzbekiston soʻnggi sakkiz oyda propan importini 2,4 baravarga ko‘paytirdi. Bu boradagi ma’lumotlar Bojxona qo‘mitasi tomonidan e’lon qilindi.
2026-yil yanvar-avgust oylarida mamlakat xorijdan jami 124,3 mln dollarlik 209,62 ming tonna suyultirilgan gaz (propan) xarid qildi. Bu ko‘rsatkich 2025-yilning shu davridagi 35,7 mln dollarlik 87,73 ming tonna hajmga nisbatan 2,4 baravar yuqori.
Joriy yilning dastlabki sakkiz oyida bir tonna mahsulotning o‘rtacha import narxi 593 dollarni tashkil etgan bo‘lsa, 2025-yil yanvar-avgustida bu ko‘rsatkich 407 dollar edi. Demak, bu yilgi propan importi qiymati qariyb 45,7 foizga oshgan.
Oylar bo‘yicha propan importi quyidagicha qayd etilgan:
- yanvar — 25,7 ming tonna;
- fevral — 28,7 ming tonna;
- mart — 30,1 ming tonna;
- aprel — 23 ming tonna;
- may — 21,9 ming tonna;
- iyun — 26,6 ming tonna;
- iyul — 27,2 ming tonna;
- avgust — 26,2 ming tonna.
Taqqoslash uchun, 2024-yil davomida chetdan 119,4 ming tonna, 2025-yilda esa 163,6 ming tonna suyultirilgan gaz sotib olingan edi. Shunday qilib, 2026-yilning dastlabki sakkiz oyi ko‘rsatkichi avvalgi yillarning yillik raqamlaridan ham sezilarli darajada yuqori bo‘ldi.
2026-yil 11-sentyabr kuni birjada propanning bir tonnasi 7,54 mln so‘mdan (641 dollar) sotilgan. Bir yil oldin esa bu narx 6,7 mln so‘mni tashkil etgan. Statistika qo‘mitasi propan narxi 2025-yil avgustdan 2026-yil avgustgacha qariyb 41,4 foizga qimmatlashganini bildirgan.