O‘zbekiston JSTga a’zolik bo‘yicha davlatlarning 400 dan ortiq savoliga javob bergan
Bugun, 3 noyabr kuni Kontent markazida Jahon savdo tashkilotiga a’zolik jarayoni, muzokaralar natijalari, qonunchilik islohotlari
O‘zbekiston JSTga a’zolik yuzasidan davlatlarning 400 dan ortiq savoliga javob berdi
Bugun, 3 noyabr kuni Kontent markazida Jahon savdo tashkilotiga a’zolik jarayoni, muzokaralar natijalari, qonunchilikdagi islohotlar va keyingi vazifalar muhokama qilindi.
Matbuot anjumanida O‘zbekistonning JSTga a’zo bo‘lishi bo‘yicha Ishchi guruh raisi, elchi Sung-Ye Choy, tashkilot Kotibiyatining A’zolik bo‘linmasi direktori Mayka Oshikava hamda davlat idoralari vakillari qatnashdi.
Tadbirda 2026-yilda Ishchi guruhning 12- va 13-yig‘ilishlari o‘tkazilgani bildirildi. Ularda a’zo davlatlarning 400 dan ortiq savoliga javob berildi va 30 dan ziyod hujjat taqdim etildi.
Shuningdek, tovarlar va xizmatlar bozorlariga kirish bo‘yicha ikki tomonlama muzokaralarda sezilarli natijalarga erishilgani qayd etildi.
O‘zbekiston qonunchiligini JST bitimlariga moslashtirish doirasida 2023-yildan buyon 200 dan ortiq normativ-huquqiy hujjat qabul qilindi va takomillashtirildi.
Ular tashqi savdoni liberallashtirish, davlat korxonalarining eksklyuziv huquqlarini bekor qilish, texnik jihatdan tartibga solish, sanitariya va fitosanitariya choralari hamda bojxona tartib-taomillarini xalqaro talablarga uyg‘unlashtirishni qamrab oldi.
Matbuot anjumanida qolgan muzokaralarni yakunlash, Ishchi guruh hisoboti loyihasidagi majburiyatlarni kelishish va a’zolik hujjatlarini yakunlash masalalari ham ko‘rib chiqildi.
Tadbirda ta’kidlanishicha, JSTga a’zolik tashqi savdo imkoniyatlarini kengaytirish, investitsiya muhitini yaxshilash, milliy iqtisodiyot raqobatbardoshligini oshirish va mamlakatning jahon iqtisodiyotiga integratsiyalashuvini chuqurlashtirishga xizmat qiladi.