“O‘zbekfilm”ning 22,9 mln yevro krediti bor”. Kinematogarfiya agentligi rahbari Jahongir Ahmedov kinostudiyaning hozirgi ahvoli haqida

“O‘zbekfilm” kinostudiyasi 22,9 million yevro miqdorida kreditga ega. Kinematografiya agentligi rahbari Jahongir Ahmedov kinostudiyaning hozirgi holati haqida ma’lumot berdi.

O‘zbek kinosi tarixida muhim o‘rin tutuvchi “O‘zbekfilm” kinostudiyasi bugungi kunda jiddiy moliyaviy qiyinchiliklarga duch kelgan. Studiya katta miqdordagi kredit majburiyatlari, soliq va ish haqi bo‘yicha qarzdorliklar bilan to‘qnash kelgan. Hatto uning mol-mulki va yer maydonlari ham kredit uchun garovga qo‘yilgani aytilmoqda. Bu haqda Kinematografiya agentligi direktori Jahongir Ahmedov o‘zining Instagram sahifasida xabar berdi.

Ahmedovning so‘zlariga ko‘ra, muammolar juda ko‘p, ammo hozirda eng muhim vazifa “O‘zbekfilm”ni saqlab qolish va uni garovdan ozod qilishdir.

Uning ta’kidlashicha, “O‘zbekfilm”ning 22,9 million yevro miqdorida kredit majburiyati bor va studiyaning mol-mulki, jumladan, yer maydonlari ham ushbu kredit uchun garovga qo‘yilgan.

Bundan tashqari, soliqlar bo‘yicha qariyb 1 milliard so‘mdan ortiq qarzdorlik to‘plangani sababli, kinostudiya balansidagi 12 ta avtomashina 12 kun ichida auksionga qo‘yilishi xavfi mavjud. Xodimlarning ish haqlari bo‘yicha ham katta qarzdorliklar yuzaga kelgan.

Kinostudiya bir yilda kamida 60 milliard so‘mlik buyurtma bajarmasa, o‘zini saqlab qola olmaydi, ya’ni u amalda davlat buyurtmasiga qaram bo‘lib qolgan. Studiyada biznes modeli yo‘q va bozor mexanizmiga to‘liq o‘tilmagan.

Ahmedovning so‘zlariga ko‘ra, bu shunchaki raqamlar emas, balki bir asrlik o‘zbek kinosi tarixi, uning obro‘si va taqdiri ushbu raqamlar ortida turibdi. “O‘zbekfilm”da ko‘plab buyuk rejissyorlar, aktyorlar, operatorlar, rassomlar va kino mutaxassislari o‘z faoliyatini boshlagan. Xalqimiz bugun ham sevib tomosha qiladigan ko‘plab filmlar aynan shu yerda yaratilgan.

Jahongir Odilxo‘jayevich Ahmedov 2026-yil 10-iyul kuni prezident qarori bilan O‘zbekiston Respublikasi madaniyat vazirining birinchi o‘rinbosari – O‘zbekiston Respublikasi Madaniyat vazirligi huzuridagi Kinematografiya agentligi direktori lavozimiga tayinlangan edi. Bungacha Kinematografiya agentligiga Shuhrat Rizayev rahbarlik qilgan.