Osiyoda millionlar jangi: «Paxtakor», «Neftchi» va «Nasaf» qancha pul ishlaydi?
«Paxtakor», «Neftchi» va «Nasaf» klublari 2026/2027 yilgi mavsumda Osiyo klublar musobaqalarida yurtimiz sharafini himoya qilmoqda
Osiyoda millionlar jangi: «Paxtakor», «Neftchi» va «Nasaf» qancha pul ishlaydi?
«Paxtakor», «Neftchi» va «Nasaf» klublari 2026/2027-yilgi mavsumda Osiyo klublar musobaqalarida yurtimiz nomidan qatnashmoqda. «Paxtakor» va «Neftchi» OFK Chempionlar ligasi Elit (Elite) turnirida, «Nasaf» esa OFK Chempionlar ligasi 2 musobaqasida ishtirok etmoqda.
Jamoalarga turnirdagi qatnashuvi, har bir g‘alabasi va keyingi bosqichlarga chiqishi uchun OFK tomonidan katta miqdorda mukofot pullari beriladi.
«Paxtakor» va «Neftchi» nufuzli Elit turnirning asosiy (liga) bosqichida qatnashgani uchun kafolatlangan 800 ming AQSh dollarini oladi. Bundan tashqari, ushbu musobaqada har bir g‘alaba uchun jamoalar qo‘shimcha 100 ming dollar bonus ishlab olishi mumkin. Klublarning jami daromadi ular qayd etadigan natijalar va g‘alabalar soniga qarab ortib boradi.
Musobaqaning pley-off bosqichida ham mukofot pullari ancha yuqori. OFK Chempionlar ligasi Elit turnirida 1/8 finalga chiqqan klubga 200 ming dollar, chorak final ishtirokchisiga 400 ming dollar, yarim finalga yo‘l olgan jamoaga esa 600 ming dollar mukofot puli beriladi.
Musobaqa g‘olibi — turnir chempioni 10 million dollarlik bosh sovrinni qo‘lga kiritadi. Finalda mag‘lub bo‘lgan jamoaga 4 million dollar mukofot puli to‘lanadi. Qisqasi, «Paxtakor» va «Neftchi» musobaqada qanchalik uzoqqa borsa, shunchalik ko‘p daromad oladi — bu mablag‘ bir necha million dollarga yetishi mumkin.
«Nasaf» OFK Chempionlar ligasi 2 turnirini guruh bosqichidan boshlaydi. Ushbu bosqichda qatnashgani uchun qarshiliklarga kafolatlangan 300 ming dollar mukofot puli ajratiladi. Bundan tashqari, guruhdagi har bir g‘alaba uchun 50 ming dollardan qo‘shimcha bonus berilishi ko‘zda tutilgan.
OFK Chempionlar ligasi 2 turnirining pley-off bosqichida sovrinlar quyidagicha taqsimlanadi: 1/8 finalga chiqqan klub 80 ming dollar, chorak finalga yo‘l olgan jamoa 160 ming dollar, yarim final ishtirokchisi esa 240 ming dollar mukofot oladi.
Turnir g‘olibiga 2,5 million dollar, finalchiga 1 million dollar mukofot puli beriladi. Shunday qilib, «Nasaf» ham musobaqadagi muvaffaqiyatli natijalari evaziga boshlang‘ich 300 ming dollarni bir necha million dollargacha oshirish imkoniyatiga ega.