Ortiqcha vazndan xalos bo‘lishga yordam beradigan ertalabki odatlar
Ortiqcha vazndan qutulishga yordam beradigan ertalabki odatlar
Tezroq ozish uchun qanday tavsiyalarga amal qilish kerak? Kimdir kamroq ovqat yeyishga urinadi, boshqalar kun davomida ovqatlanishni qat’iy cheklashni ma’qul ko‘radi, ayrimlar esa ratsionidan muayyan mahsulotlarni chiqarib tashlaydi. Biroq chiroyli qomat siri kunning ilk qismi bilan bog‘liq bo‘lishi mumkin.
**Nonushtani tashlab yubormang**
Nonushta ko‘pincha kunning eng muhim taomi deb ataladi. Buning sababi shuki, nonushtani o‘tkazib yuborib, ishga shoshilish kun oxirida shirinlik yeyish ehtimolini oshiradi. To‘yimli ertalabki nonushta nafaqat tanadagi glyukoza zaxiralarini to‘ldirib, energiya darajasini oshiradi, balki tungi parhezni to‘xtatib, qomatni saqlashga ham yordam beradi. Better Health ma’lumotiga ko‘ra, ertalab nonushta qilishga vaqt ajratish vaznni yaxshiroq nazorat qilish, ikkinchi toifa diabet va yurak kasalliklari xavfini kamaytirishga olib keladi.
**Nonushta uchun foydali mahsulotlarni tanlang**
Better Health o‘z vaznini barqarorlashtirmoqchi bo‘lganlarga nonushta uchun donli taomlarni iste’mol qilishni tavsiya etadi. Shuningdek, meva, yong‘oqlar va tabiiy yog‘li yogurt tanaga zarur bo‘lgan barcha moddalarning ajoyib manbai hisoblanadi. Parhezshunoslar kam yog‘li sut mahsulotlaridan voz kechishni maslahat beradi. Bundan tashqari, nonushta uchun eng foydali tarkibiy qism tuxumdir. Uni salat, pishirilgan loviya, sabzavotlar, avokado va ismaloq bilan iste’mol qilish kerak. Healthline’ning ta’kidlashicha, oqsilga boy mahsulotlardan tayyorlangan nonushta organizmdagi “ochlik gormoni” – grelin darajasini pasaytiradi.
**Tongni suv ichishdan boshlang**
Bu ko‘pincha vazn yo‘qotishda “minimal usul” deb ataladi. Bunga bir stakan suv ichish energiya sarfini yoki organizm yoqadigan kaloriyalar sonini kamida 60 daqiqaga oshirishi sabab bo‘ladi. Healthline’ga ko‘ra, tongni bir yoki ikki stakan suv bilan boshlash vazn yo‘qotishni tezlashtirishning eng oson usuli hisoblanadi.
**Erta uyg‘oning va yegulik tayyorlang**
Odatdagidan atigi bir soat oldin uyg‘onish nafaqat foydali nonushta, balki ishga olib borish uchun tushlik ham tayyorlash imkonini beradi. Tushlikni sotib olish yoki yetkazib berishga buyurtma qilish oson bo‘lsa-da, uni uyda tayyorlash iste’mol qilinadigan kaloriyalarni kuzatishni va ortiqcha miqdorni kamaytirishni yengillashtiradi. Umuman olganda, ertaroq uyg‘onish kunni to‘g‘ri taqsimlashga yordam beradi, bu esa o‘z navbatida sog‘lom odatlar va to‘g‘ri qarorlar qabul qilishga undaydi.
**Ishga boradigan yo‘lda sayr qiling**
Sog‘lom bo‘lish nuqtayi nazaridan, hatto jamoat transportida yurish ham mashina haydashdan ko‘ra foydaliroqdir. Piyoda yoki velosipedda yurishning foydasi haqida esa gapirmasa ham bo‘ladi. Buyuk Britaniya Milliy Tibbiyot kutubxonasi o‘tkazgan tadqiqotda 822 ishtirokchi to‘rt yil davomida kuzatildi va ish joyiga mashinada kelganlarda boshqalarga qaraganda umumiy vazn ortishi aniqlangan. Shunday ekan, maslahat oddiy: hatto sovuq mavsumda ham piyoda yurishni kun tartibining bir qismiga aylantirish kerak. Olimlarning aytishicha, faollik va erta uyg‘onish sovuq havoda tetik bo‘lishga yordam beradi.
**Quyoshli kunda piyoda yuring**
Healthline bu maslahatni shunday izohlaydi: “Quyosh nuri D vitaminiga bo‘lgan ehtiyojni qondirishning eng yaxshi usuli hisoblanadi. Ba’zi tadqiqotlar shuni ko‘rsatdiki, D vitaminiga bo‘lgan ehtiyojni qondirish vazn yo‘qotishga yordam beradi va semirishning oldini oladi”.
**Mashqlar bajaring**
Agar ishga piyoda borishning imkoni bo‘lmasa, ertalab mashq qilish uchun vaqt ajratish kerak. Bu kunni boshlash, energiya olish va kaloriyalar sarflashning ajoyib usuli. Vazn yo‘qotishda sportning samaradorligi borasida turli qarashlar mavjud, ammo ertalabki mashg‘ulotlarning foydasiga ishonadigan shaxsiy murabbiy Bredli Simmonds shunday deydi:
“Men eng yaxshi deb hisoblangan vaqt – har doim mashq qilishni tavsiya qilaman. Ammo agar ertalab mashq qila olsangiz, bu kunni boshlashning eng yaxshi usuli. Ertalabki mashqlarning afzalliklaridan biri shundaki, u qondagi qand miqdorini kun davomida barqaror ushlab turadi, ortiqcha ovqatlanishning oldini oladi”.