Oq uy CNN telekanaliga Tramp bilan birga Air Force One (Prezident samolyoti) bortida uchishni taqiqladi
CNN shanba kuni AQSh Prezidenti Donald Tramp bilan birga uning Tennessiga safariga uchishi rejalashtirilgan edi.
Oq uy CNN telekanaliga Tramp bilan birga Air Force One (Prezident samolyoti) bortida uchishni taqiqladi
AQShning CNN telekanaliga shanba kuni Tennessiga safar chogʻida Prezident Donald Trampga Air Force One bortida hamrohlik qilish taqiqlandi.
Ushbu qaror Oq uy baʼzi ommaviy axborot vositalariga qoʻyilgan taqiqni bekor qilishga majbur boʻlganidan keyin, maʼmuriyat va OAV oʻrtasidagi nizoning navbatdagi rivojlanishi boʻldi.
CNN Trampning Amerika futboli boʻyicha kollejlar oʻrtasidagi oʻyinga Tennessiga qiladigan safarida unga hamrohlik qilishi kerak edi, biroq Oq uy tomonidan juma kuni kechqurun eʼlon qilingan maʼlumotda ushbu telekanal OAV jadvaliga kiritilmagan.
CNN xabariga koʻra, prezidentning dastlabki ish rejasida ularning oʻrnini egallaydigan boshqa biror bir OAV nomi koʻrsatilmagan.
Oʻtgan hafta Tramp CNN, Politico va MS NOW jurnalistlarini uning maʼmuriyati haqida «uydirma yoki yolgʻon» tarqatishda ayblab, ularning Oq uyga kirishini taqiqlagan edi.
Uchchala OAV ham sudga murojaat qilishini bildirdi va Trampni ularning soʻz va matbuot erkinligiga doir konstitutsiyaviy huquqlarini buzishda aybladi.
Odatda Oq uy voqealarini CNN bilan birgalikda navbatma-navbat yoritib boradigan toʻrtta telekanal — ABC, CBS, Fox News va NBC taqiqlangan OAV bilan birdamlik belgisi sifatida prezident haqidagi koʻrsatuvlarini toʻxtatib qoʻygan edi.
Shundan soʻng, Oq uy Nyu-Yorkdagi BMT Bosh Assambleyasi oldidan oʻzining Trump TV nomli striming kanalini ishga tushirdi.
Keyinchalik federal sudya Trampning OAVni Oq uydan mahrum qilishi katta ehtimol bilan konstitutsiyaga zid ekani va maʼmuriyat hech boʻlmaganda hozircha ularning qaytishiga ruxsat berishi kerakligi haqida qaror chiqardi.
Shunday boʻlsa-da, Oq uy payshanba kuni Xitoy rahbari Si Tszinpin sharafiga tashkil etilgan davlat qabuliga mehmonlarning kelishini yoritish uchun biriktirilgan ayrim CNN va MS NOW muxbirlarining kirishini baribir rad etdi.
Bundan avval Oq uyning aloqa boʻlimi akkaunti X tarmogʻida shunday deb yozgan edi: «Soxta yangiliklar (Fake News) sizlarni ishontirmoqchi boʻlgan narsaning teskarisi oʻlaroq, ular Oq uyning istalgan qismiga, istalgan tadbirga va matbuot uchun har bir qoʻngʻiroqqa erkin kirish huquqiga ega emaslar».
Juma kuni Oq uy rasmiylari reportyorlarni ichkariga kiritganidan keyin AQSh telekanallarining odatiy koʻrsatuvlari qayta tiklandi.
Prezident shanba kuni tushdan keyin Noksvilldagi «Neyland» stadionida Tennessi universiteti va Texas universiteti kollejlari oʻrtasidagi futbol oʻyinida ishtirok etishi kutilmoqda.