«Oltin toʻp» uchun 30 nomzod: Messi bor, Ronaldu yoʻq
France Football dunyo sportidagi eng mashhur sovrin «Oltin toʻp» uchun 30 nomzodni eʼlon qildi. Sovrin 26-oktabr kuni ilk marta Londonda topshiriladi. Nomzodlar orasida Yevropadan ketganiga ancha boʻlgan Lionel Messi ham bor. Lekin argentinalikning doimiy raqobatchisi Ronaldu roʻyxatga kiritilmadi.
«Oltin toʻp» uchun 30 nomzod eʼlon qilindi: Messi bor, Ronaldu yoʻq
Argentina milliy jamoasidagi faoliyatini yakunlagan Lionel Messi 17-marta «Oltin toʻp» uchun nomzodlar qatoriga kiritildi. Bunday holat boshqa hech bir futbolchi bilan yuz bermagan.
Messi, shuningdek, «Oltin toʻp»ga eng katta vaqt oraligʻi bilan nomzod boʻlgan futbolchi sifatida oʻziga xos rekord ham oʻrnatdi. U ilk bor 2006-yilda, sochini oʻstirib yurgan, endigina oʻgʻillarining onasi Antonella bilan munosabatlarini tiklagan 19 yoshli yigit paytida dunyo futbolining bosh mukofoti uchun nomzod boʻlgandi. Oʻsha yili sovrinni bizning Kannavaro qoʻlga kiritgan.
Oradan 20 yil oʻtib, qarib borayotgani sezilgan, katta oʻgʻli maktabni bitirayotgan, soqol qoʻygan Messi yana «Oltin toʻp»ni yutish uchun 30 nomzod orasida! Bu safar avvalgi xizmatlari uchun emas, balki oxirgi mundialda hamon yuqori saviyada ekanini isbotlagani, yakka oʻzi Argentinani uchinchi marta JCh finaligacha olib chiqqani uchun. Insonning 20 yil davomida jismoniy holatini bunday darajada saqlab qolishi haqiqatan ham havas qilsa arziydi.
Soʻnggi yillarda «Oltin toʻp»ga munosabat ham oʻzgardi. Masalan, pandemiya sabab Levandovskiyga mukofot topshirilmagani katta nohaqlik boʻlgandi. Bu yilgi nomzodlar orasida ham tushunarsiz jihatlar bor. Masalan, Saudiya chempionatida oʻynaydigan Xulian Kinones va Sadio Mane nega nomzodlar safidan joy olgani mutlaqo tushunarsiz. «Oltin toʻp» avvallari Yevropa chempionatlarida oʻynaydigan eng yaxshi futbolchiga berilardi, keyin esa dunyoning eng yaxshi futbolchisiga beriladigan boʻldi. Baribir Yevropada oʻynaydigan futbolchilarga ustunlik berilishi kerak. Chunki koʻhna qitʼa futboli bilan Saudiya ligasi oʻrtasidagi farq katta.
Tashkilotchilar mukofot aynan kimga berilishini aniqlab olishi kerak: YeChLda eng yaxshi oʻynagan futbolchigami, JChdagimi yoki umumiy individual oʻyinlarga qarabmi? Toʻgʻrisini aytganda, oʻtgan mavsumda hech bir futbolchi boshqalardan yaqqol ajralib turmadi. YeChLda PSJ gʻolib boʻldi, mantiqan qaralsa, Xvicha jamoaning eng zoʻri edi. Ammo Luis Enrikening murabbiylik mahorati hech bir futbolchining qahramonligiga oʻrin qoldirmadi. JChda ham shunday boʻldi. Ispaniya haqida gap ketganda, Luis de la Fuyente nomi hammadan yuqorida tilga olindi. Messi va Ronaldu davridagidek hech kim savollarga oʻrin qoldirmaydigan darajada boʻlmadi.
Endi «Oltin toʻp»ga bu yil kim munosib ekani haqidagi shaxsiy fikrimni aytsam. Asosiy masala uchlik va beshlikda kimlar boʻlishida. Menimcha, kuchli beshlikda Rodri, Mbappe, Keyn, Messi va Yamal boʻlsa kerak. Balki odatdagidek PSJdan kimnidir qoʻshishar. Balki Fabian Ruis, balki Dembele. Kuchli uchlikda esa juda zoʻr yevromavsum oʻtkazgan Keyn, Mbappe va jahon chempioni boʻlgan Ispaniya sardori Rodri boʻlsa kerak.