Olmaliqda 15 million dollarlik turistik "Ekopark" barpo etiladi

Olmaliqda 15 million dollar evaziga «Ekopark» turistik bogʻi barpo etiladi

Olmaliq shahrining «Kamalak» mahallasida qariyb 15 million dollarlik toʻgʻridan-toʻgʻri xorijiy investitsiyalarni jalb qilgan holda «Ekopark» turistik bogʻini barpo etish rejalashtirilmoqda. Loyihani ishga tushirish boʻyicha kelishuvga shahar hokimi Barhayot Meliyevning Xitoyning Haocheng Industry Group kompaniyasi vakillari bilan uchrashuvida erishildi.

Taqdim etilgan kontseptsiyaga koʻra, yangi bogʻ katta koʻkalamzorlashtirilgan hududda joylashadi. Bu yerda sunʼiy suv havzalari va kanallar, sayr zonalari, sport va rekreatsiya maydonchalari, shuningdek, avtoturargohlar va zarur infratuzilmani yaratish koʻzda tutilgan.

Loyiha Olmaliq aholisi va mehmonlari uchun zamonaviy hordiq chiqarish maskaniga aylanishi, shuningdek, shaharning yashil hududlarini sezilarli darajada kengaytirishi kerak.

Xitoyning Haocheng Industry Group kompaniyasi EPC+F modeli asosida energetika va infratuzilma obʼyektlarini moliyalashtirish va qurish bilan shugʻullanadi. Investor bungacha Avstraliya, Xitoy va Indoneziyada loyihalarni amalga oshirgan.

Oʻzbekistonda kompaniya umumiy qiymati 420 million dollardan ortiq boʻlgan energetika va infratuzilma loyihalarini amalga oshirishda ishtirok etmoqda. Xususan, Haocheng Industry Group Yangi Toshkent hududidagi va Sirdaryo IESdagi tashabbuslarga jalb etilgan.