OIIB Oʻzbekistondagi loyihalarni 5 milliard dollargacha moliyalashtirishi mumkin
Oʻzbekiston va Osiyo infratuzilmaviy investitsiyalar banki 2026–2029 yillarga moʻljallangan yangilangan investitsiya dasturini imzoladi. U mamlakatdagi infratuzilma loyihalarini 5 milliard dollargacha boʻlgan miqdorda moliyalashtirish imkoniyatini nazarda tutadi. Bundan tashqari, bank elektr tarmoqlarini modernizatsiya qilishga tayyorgarlik koʻrish uchun alohida grant ajratadi.
OIIB Oʻzbekistondagi loyihalarga 5 mlrd dollargacha mablagʻ ajratishi mumkin
Osiyo infratuzilmaviy investitsiyalar banki (OIIB) 2026−2029 yillarga moʻljallangan yangilangan uzoq muddatli investitsiya dasturini imzoladi, unda mamlakatdagi infratuzilma loyihalarini 5 milliard dollargacha boʻlgan miqdorda moliyalashtirish imkoniyati koʻzda tutilgan. Bu haqda «Gazeta»ga OIIBdan maʼlum qilishdi.
Hujjatlar 28 sentyabr kuni Doha shahrida OIIBning 11-yillik yigʻilishi doirasida imzolandi.
Bank tomonidan kelishuvlarni OIIBning 2-mintaqa davlat sektori boʻyicha investitsiya bloki, shuningdek, mijozlarning loyihaviy va korporativ moliyalashtirish boʻlimi rahbari Konstantin Limitovskiy imzoladi. Oʻzbekiston tomonidan esa — investitsiyalar, sanoat va savdo vaziri oʻrinbosari Shohruh Gʻulomov imzo chekdi.
Marosim investitsiyalar, sanoat va savdo vaziri, shuningdek, OIIBda Oʻzbekiston tomonidan boshqaruvchi boʻlgan Laziz Qudratov ishtirokida boʻlib oʻtdi.
Yangilangan koʻp yillik investitsiya dasturi tomonlarning yaqin yillardagi hamkorligining ustuvor yoʻnalishlarini belgilab beradi. Unga bank tomonidan 2026−2029 yillarda Oʻzbekistonda umumiy qiymati 5 milliard dollargacha moliyalashtirilishi mumkin boʻlgan infratuzilma loyihalari kiritilgan.
«OIIBning taʼsischi davlatlaridan biri sifatida Oʻzbekiston doimo kuchli va ishonchli hamkor boʻlib kelgan, uning investitsiya loyihalari roʻyxati esa aniq milliy ustuvorliklarni aks ettiradi. Yangilangan dastur 2029 yilgacha boʻlgan hamkorligimiz yoʻnalishini belgilab beradi», — dedi Konstantin Limitovskiy.
Laziz Qudratovning soʻzlariga koʻra, Oʻzbekiston OIIBning mintaqadagi eng yirik hamkori hisoblanadi.
«Yangilangan dastur bilan biz hamkorligimizni yanada yaqinroq qilishga, koʻproq xususiy investorlarni jalb etishga va birgalikda umumiy rejalarni aniq loyihalarga tezroq aylantirishga umid qilamiz», — dedi vazir.
Bundan tashqari, tomonlar OIIBning Loyihalarni tayyorlash maxsus fondidan 1,5 million dollar miqdorida grant ajratish toʻgʻrisidagi bitimni imzoladilar.
Mablagʻlar «Oʻzbekiston elektr uzatish tizimining barqarorligini oshirish» loyihasini tayyorlashga yoʻnaltiriladi. Ular texnik tadqiqotlar va boʻlajak investitsiya loyihasining asosi boʻlishi kerak boʻlgan boshqa dastlabki ishlar uchun ishlatiladi.
Unda elektr tarmoqlarining oʻtkazuvchanlik qobiliyatini oshirish, ularning ishonchliligi va iqlim xavf-xatarlariga chidamliligini oshirish, shuningdek, qayta tiklanuvchi energiya manbalari obʼyektlarini ulash uchun qoʻshimcha imkoniyatlar yaratish koʻzda tutilgan.
Tayyorgarlik bosqichida texnik yechimlarni aniqlashtirish, zarur investitsiyalar hajmi va iqlim xavf-xatarlarini baholash rejalashtirilgan.
Alohida eʼtibor elektr tarmoqlarining ustuvor uchastkalariga, jumladan, Surxondaryo va Samarqand viloyatlari oʻrtasidagi janubiy yoʻlakka, shuningdek, Fargʻona vodiysiga qaratiladi. Tarmoqlarning eng zaif uchastkalarini bartaraf etish va qayta tiklanuvchi manbalardan olinadigan generatsiyaning oʻsib borayotgan hajmini ulash uchun yechimlarni aniqlash koʻzda tutilmoqda.
Oʻzbekiston 2030 yilga borib elektr energiyasi ishlab chiqarishda qayta tiklanuvchi manbalar ulushini taxminan 30 foizdan 54 foizgacha oshirishni rejalashtirmoqda. Buning uchun elektr tarmoqlari infratuzilmasini modernizatsiya qilish va kengaytirish talab etiladi.