Oʻzbekistonliklar Qozogʻistonga safar qilish uchun elektron ruxsatnoma rasmiylashtirishiga toʻgʻri keladi
Oʻzbekistonliklar Qozogʻistonga safar qilish uchun elektron ruxsatnoma olishlariga toʻgʻri keladi
Xorijliklar, jumladan Oʻzbekiston fuqarolari Qozogʻistonga kirish uchun elektron ruxsatnoma olishlari talab etiladi. Qozogʻiston hukumati uni rasmiylashtirish tartibini tasdiqladi va hujjat qiymatini nol soʻm (bepul) qilib belgiladi. Avvalroq mamlakat IIV bunday ruxsatnomalarni berish uchun toʻlov undirishni taklif qilgan edi.
Yangi qoidalar 2026 yilning noyabr oyidan boshlab bosqichma-bosqich joriy etiladi. Birinchi bosqichda ular Oqtau xalqaro aeroportida va ayrim avtomobil oʻtkazish punktlarida ishlay boshlaydi. 2027 yil 1 yanvardan tizim Ostana va Olmaota aeroportlariga, 1 martdan esa qolgan oʻtkazish punktlariga tatbiq etiladi.
Dastlabki oylarda ruxsatnomaning yoʻqligi mamlakatga kirishni rad etish uchun asos boʻlmaydi. Oʻtkazish punktlari xodimlari sayyohlarni hujjatni rasmiylashtirish zarurligi haqida ogohlantiradilar. Biroq 2027 yil 1 iyuldan eʼtiboran uning mavjudligi majburiy boʻladi, ruxsatnomaning yoʻqligi esa chet ellikka mamlakatga kirishni rad etishga imkon beradi.
Raqamli platforma orqali arizani rejalashtirilayotgan safardan kamida 72 soat oldin topshirish kerak boʻladi. Talab Qozogʻiston vizasiz qatnov toʻgʻrisida bitim tuzgan mamlakatlar fuqarolariga, shuningdek, Yevroosiyo iqtisodiy ittifoqi davlatlariga nisbatan tatbiq etiladi.
Shu bilan birga, istisnolar nazarda tutilgan. Vizasiz mamlakatlarning 16 yoshdan kichik va 65 yoshdan katta boʻlgan fuqarolariga, xalqaro yuk avtomobillari va avtobus haydovchilariga, havo va suv kemalari ekipaji aʼzolariga, poyezd brigadalariga, shuningdek, diplomatlar va rasmiy delegatsiyalarning ayrim toifalariga ruxsatnoma talab qilinmaydi. Istisnolar xorijliklarning boshqa bir qator toifalari uchun ham nazarda tutilgan.
Avvalroq Qozogʻiston Ichki ishlar vazirligi "Ochiq NPA" portalida ETA'ni rasmiylashtirish uchun davlat boji undirishni nazarda tutuvchi qonun loyihasini jamoatchilik muhokamasiga qoʻygan edi. Yigʻilgan mablagʻlarni raqamli infratuzilmani saqlash va shaxsiy maʼlumotlar himoyasini kuchaytirishga yoʻnaltirish rejalashtirilgan edi.
Biroq ommaviy maslahatlashuvlar va idoralararo kelishuvlar yakunlariga koʻra, sayyohlar, ishbilarmonlik safarlari va qoʻshni davlatlar oʻrtasidagi qarindoshlik aloqalari uchun qoʻshimcha moliyaviy toʻsiqlar yaratmaslik maqsadida yigʻimlardan voz kechishga qaror qilindi.