Oʻzbekistonlik talaba qiz "Tatar qizi – 2026" tanlovida gʻolib boʻldi

Oʻzbekistonlik talaba qiz "Tatar kizi – 2026" tanlovi gʻolibi boʻldi

Oʻzbekistonlik Amina Mahmudova Turkmanistonning Turkmanboshi shahrida final bosqichi boʻlib oʻtgan "Tatar kizi – 2026" xalqaro tanlovida gʻolib chiqdi. Bosh sovrin — Zeekr 9X yoʻltanlamas avtomobili unga mamlakat prezidenti Serdar Berdimuhamedov nomidan topshirildi.

Hal qiluvchi bosqichda 12 nafar qiz ishtirok etdi. Ishtirokchilar oʻz ona tili, tatar xalqining tarixi va urf-odatlarini bilishlarini namoyish etdilar, shuningdek, oʻz ijodiy qobiliyatlarini koʻrsatdilar.

Taqdirlash marosimida Amina ota-onasiga minnatdorchilik bildirib, uning yutuqlari ortida ularning mehri, tarbiyasi va ishonchi turganini taʼkidladi. Bundan tashqari, u Tatarston Raisi, Butunjahon tatar kongressi va tanlov tashkilotchilariga tatar xalqi va uning tilini ifoda etish imkoniyati uchun tashakkur izhor etdi.

Mahmudova Botir Zokirov nomidagi Milliy estrada sanʼati institutida tahsil olmoqda, xonandalik kasbini egallamoqda va vokal oʻqituvchisi boʻlib ishlamoqda.

Bosh unvondan tashqari, tanlovda maxsus nominatsiyalar boʻyicha ham mukofotlar topshirildi. Tatarston vakili Dina Zaripova "Eng gʻayratli qiz" unvoniga sazovor boʻldi, Amina esa, shuningdek, "Eng mayin ovozli qiz" deb topildi.

Final ilk bor Turkmanistonda boʻlib oʻtdi — tanlov oʻtkaziladigan mamlakat oʻtgan yilgi gʻolibning kelib chiqish joyiga qarab tanlanadi. 2025 yilda tojni toshoʻgʻuzlik Alsu Rafiqova qoʻlga kiritgan edi.

Bundan avvalroq oʻzbekistonlik talaba qiz "Rosatom" tanlovida gʻolib chiqib, Shimoliy qutbga ilmiy-maʼrifiy ekspeditsiya tarkibiga kirgan edi.