Oʻzbekistondagi tibbiyot muassasalari bayram kunlari qanday ishlashi eʼlon qilindi.

O'zbekistondagi tibbiyot muassasalari 29-avgustdan 1-sentabrgacha uzluksiz ishlaydi. Bayram va dam olish kunlari uzluksiz ishlashni ta'minlash uchun Sog'liqni saqlash vazirligi maxsus shtab tuzdi.

Sog'liqni saqlash vazirligi matbuot xizmati taqdim etgan ma'lumotlarga ko'ra, barcha tibbiyot muassasalari, jumladan, tuman, shahar, viloyat va respublika kasalxonalari, ixtisoslashtirilgan markazlar va tibbiyot universitetlari qoshidagi klinikalar navbatchilik rejimida ishlaydi. Shuningdek, travmatologiya va qon tomir kasalliklariga ixtisoslashgan 39 ta tumanlararo markazlarda ham navbatchilik rejimi joriy etilgan.

Shoshilinch tibbiy yordam xizmati odatiy faoliyatini davom ettiradi. Mamlakat bo'ylab 14 ta filial, 189 ta stansiya, 40 ta kichik stansiya va 1492 ta yordam punktida 2900 dan ortiq brigada 24/7 navbatchilik qiladi. Barcha tug'ruqxonalar va bolalar sog'liqni saqlash muassasalari ham haftasiga yetti kun ishlaydi.

Ilgari O'zbekistonda bayram kunlari qo'shimcha temir yo'l, avtomobil va havo qatnovlari yo'lga qo'yilishi haqida xabar berilgan edi. Ushbu chora-tadbirlar ichki turizmni rag'batlantirish va qulay sayohat sharoitlarini yaratishga qaratilgan.