Oʻzbekistondagi «Gelon» togʻ-changʻi kurortining birinchi navbatini 2027 yilda ochish rejalashtirilmoqda

Oʻzbekistondagi «Gelon» togʻ-changʻi kurortining birinchi navbati 2027 yilda ochilishi rejalashtirilmoqda

22 oktyabr kuni Oʻzbekiston prezidenti Shavkat Mirziyoyev Qashqadaryo viloyatini ijtimoiy-iqtisodiy rivojlantirishga bagʻishlangan yigʻilishda «Gelon» togʻ-changʻi kurortining birinchi navbatini 2027 yilda ishga tushirish rejalarini maʼlum qildi.

Davlat rahbarining soʻzlariga koʻra, Qashqadaryo har yili 6 million turistni jalb qilish uchun barcha imkoniyatlarga ega. 2026 yil boshidan buyon viloyatga 2,5 million turist tashrif buyurgan boʻlsa, shundan 500 mingi faqat Gelon togʻ qishlogʻida boʻlgan.

Tatariston bilan hamkorlikda tashkil etilayotgan togʻ-changʻi kurortining birinchi navbatini keyingi yilda foydalanishga topshirish rejalashtirilgan.

Prezident, shuningdek, viloyatdagi boshqa togʻli aholi punktlarining turistik salohiyatini alohida taʼkidladi. Xususan, Chiroqchi tumanidagi Taragʻay, Kitob tumanidagi Bashir va Yakkabogʻ tumanidagi Tatar qishloqlarini etnoturizm markazlariga aylantirish taklif etilmoqda.

Shahrisabz tumanidagi Sayyod va Suvtushar qishloqlarida togʻ daryolaridan foydalangan holda rafting va sport turizmini rivojlantirish taklif qilinmoqda.

Mutasaddi idoralarga bir oy muddatda Gelonni ham qoʻshganda oltita qishloqda turizmni rivojlantirish boʻyicha yagona master-reja tayyorlash va 2027 yil 1 martdan umumiy qiymati 50 million dollarlik loyihalarni amalga oshirishga kirishish topshirildi.

Bundan tashqari, har bahorda Gʻuzor tumanida «Lola va kabob» gastronomik festivalini, Koʻkdala tumanida esa «Chiyal yaxna» festivalini oʻtkazish rejalashtirilmoqda.

«Gelon» xalqaro har faslli kurorti loyihasi Qashqadaryo viloyatining Shahrisabz tumanida rossiyalik investorlar ishtirokida amalga oshirilmoqda. Loyihaning dastlabki qiymati 300 million dollarni tashkil etadi.

Dastlabki kelishuvlarga 2023 yil oktyabr oyida Qozonda oʻtkazilgan Rossiya va Oʻzbekiston hududlararo hamkorligining III forumida erishilgan edi («Kazanskiye kanatniye dorogi» va «Gordeyev» arxitektura byurosi).

2024 yil dekabr oyida prezident maydoni qariyb 2900 gektar boʻlgan «Gelon» turizm-rekreatsiya zonasini tashkil etish toʻgʻrisidagi qarorni imzoladi. Uni 30 yil muddatga, keyinchalik uzaytirish imkoniyati bilan tashkil etish nazarda tutilgan.

Birinchi bosqichda, 2027 yil 1 yanvargacha investor 100 million dollar, keyingi bosqichlarda esa yana 200 million dollar sarmoya kiritishni rejalashtirgan edi.

Ikkinchi va uchinchi bosqichlarda yana 21 ta togʻ-changʻi trassasi, bir nechta dor yoʻllari, uchtadan besh yulduzligacha boʻlgan toifadagi uchta mehmonxona, 75 ta villa, tomosha minorasi va koʻngilochar obʼyektlar, jumladan, ziplayn va skaypark qurish rejalashtirilgan edi. 4000 dan ortiq yangi ish oʻrinlari yaratilishi kutilayotgan edi.

2026 yil iyun oyida Turizm qoʻmitasi raisi Abdulaziz Akkulov «Tatar-inform» agentligiga loyihalash ishlari yakunlanayotgani, shundan soʻng kurortning bosh rejasini tasdiqlash lozimligini maʼlum qildi. Uning soʻzlariga koʻra, birinchi navbatni ishga tushirish 2027 yil oxiri — 2028 yil boshida kutilayotgan edi.

Loyihaning iyun oyidagi taqdimotida, shuningdek, 100 km ga yaqin togʻ-changʻi trassalari va 23 km dor yoʻllari nazarda tutilgan edi. Qurilish toʻliq yakunlangach, kurort bir vaqtning oʻzida 13 minggacha turistni qabul qila olishi kutilmoqda.

Alohida dasturda olib boruvchi yoʻllar va muhandislik infratuzilmasini qurish nazarda tutilgan. 2024 yildagi qarorga muvofiq, ushbu maqsadlar uchun 2024—2026 yillarda 280,6 milliard soʻm ajratish koʻzda tutilgan edi.

Xususan, Hisorak qishlogʻidan Gelongacha boʻlgan 21 km uzunlikdagi yoʻlni va Hisorakdan Sarchashmagacha boʻlgan 12 km uzunlikdagi yoʻlni rekonstruktsiya qilish, shuningdek, elektr taʼminoti, suv va kanalizatsiya tarmoqlarini rivojlantirish koʻzda tutilgan.