Oʻzbekistondagi 3-MFF 10 mln. tonna rudani qayta ishladi

Oʻzbekistondagi 3-boyitish fabrikasi 10 mln tonna maʼdanni qayta ishladi

Olmaliq kon-metallurgiya kombinatining (OKMK) 3-Mis boyitish fabrikasi (3-MBF) 2026 yilning 16 martidan 4 noyabrigacha boʻlgan davrda 10 mln tonna maʼdanni qayta ishladi.

Shu davr mobaynida mis eritish zavodiga 160 ming tonnadan ortiq mis kontsenrati ham yetkazib berildi.

Ushbu ishlab chiqarish marrasiga erishilgani haqida fabrika rahbariyati OKMK boshqaruvi raisi Abdulla Xursanovga hisobot berdi.

Yangi korxona uchun bu ishga tushirilgan paytdan beri birinchi yirik natija boʻlib, ishlab chiqarish quvvatlarini oʻzlashtirish bosqichlaridan biriga aylandi.

3-MBF oʻz ishini 2026 yil 16 martda boshlagan. Oʻsha kuni Oʻzbekiston Prezidenti Shavkat Mirziyoyev korxonani ishga tushirish ramziy tugmasini bosgan edi. Fabrika «Yoshlik I» konini oʻzlashtirish loyihasining asosiy obʼyektlari qatoriga kiradi.

Korxonaning loyihaviy quvvati yiliga 60 mln tonna maʼdanni qayta ishlashga moʻljallangan. Toʻliq quvvatga chiqqach, fabrika har yili 900 ming tonnaga yaqin mis kontsentratini ishlab chiqarish imkoniga ega boʻladi.

Qayta ishlash hajmlari bosqichma-bosqich oshib bordi. Mart oyida bu koʻrsatkich 661,5 ming tonna maʼdanni tashkil etgan boʻlsa, iyun oyida — 1 mln 161 ming 805 tonnani, oktyabr oyida esa 1,6 mln tonnadan oshdi. Shu tariqa, oktyabr oyidagi hajm mart oyidagiga qaraganda deyarli 2,5 baravar yuqori boʻldi.

Fabrikada 12 ta tegirmon oʻrnatilgan boʻlib, ulardan 10 tasi allaqachon foydalanishga topshirilgan. Qolgan ikkitasida sozlash va sinov ishlari davom etmoqda. Ularni ishlab chiqarishga ulash yaqin orada kutilmoqda.

10 mln tonnalik koʻrsatkich korxonani oʻzlashtirish jarayonidagi oraliq natija boʻldi. Bundan keyin loyihaviy quvvatga bosqichma-bosqich chiqish, texnologik jarayonlarni barqarorlashtirish va mis kontsentratining zarur sifatini taʼminlash vazifalari turibdi.