Oʻzbekistonda xalqaro tijorat sudini tashkil etish muhokama qilindi

Oʻzbekistonda xalqaro tijorat sudini tashkil etish masalasi muhokama qilindi

Oʻzbekistonda «Toshkent xalqaro moliya markazi toʻgʻrisida»gi Konstitutsiyaviy qonunni amalga oshirish doirasida Toshkent xalqaro tijorat sudini tashkil etish masalalari koʻrib chiqilmoqda.

4 sentyabr kuni Adliya vaziri Akbar Toshqulov Oʻzbekiston Respublikasi Prezidentining iqtisodiy rivojlanish, samarali boshqaruv va xalqaro hamkorlik masalalari boʻyicha maslahatchisi Suma Chakrabarti bilan uchrashuv oʻtkazdi. Bu haqda Adliya vazirligi xabar bermoqda.

Muzokaralarning asosiy mavzularidan biri Toshkent xalqaro tijorat sudini tashkil etish boʻldi. Tomonlar «Toshkent xalqaro moliya markazi toʻgʻrisida»gi Konstitutsiyaviy qonunni amalga oshirish doirasida tegishli huquqiy infratuzilmani shakllantirishni muhokama qildilar.

Shuningdek, uchrashuv ishtirokchilari tijorat nizolarini hal etish mexanizmlarini rivojlantirish va xalqaro moliya markazi faoliyati uchun zarur boʻlgan huquqiy muhitni yanada takomillashtirish masalalariga toʻxtalib oʻtdilar.

Oʻzbekistonda mediatsiya, xalqaro arbitraj va nizolarni hal etishning boshqa muqobil usullarini rivojlantirishga alohida eʼtibor qaratildi.

Tomonlar, shuningdek, xorijiy ekspertlar bilan hamkorlikni kengaytirish va ingliz huquqi sohasida malakali mutaxassislar tayyorlash imkoniyatlarini koʻrib chiqdilar.

Uchrashuv davomida Oʻzbekistonda mediatsiya instituti faol rivojlanayotgani taʼkidlandi. 2026 yilning birinchi yarim yilligi yakunlariga koʻra, mediativ kelishuvlar soni toʻrt barobarga koʻpayib, 18 411 taga yetdi.

Ushbu davrda sud jarayonlari doirasida 2 897 ta mediativ kelishuv tuzildi. Adliya vazirligi maʼlumotlariga koʻra, bu raqamlar mediatsiya institutiga boʻlgan ishonch ortib borayotganidan va mamlakatda ushbu mexanizmdan foydalanishga boʻlgan talabning kengayayotganidan dalolat beradi.

Uchrashuv yakunlari boʻyicha tomonlar Toshkent xalqaro moliya markazi doirasida zamonaviy huquqiy infratuzilmani rivojlantirish boʻyicha hamkorlikni davom ettirishga kelishib oldilar.

Nizolarni hal etishning xalqaro mexanizmlarini shakllantirish, mediatsiya va arbitrajni rivojlantirish, shuningdek, ingliz huquqi sohasida ishlay oladigan mutaxassislarni tayyorlash masalalari bundan keyingi hamkorlikning markazida qoladi.