Oʻzbekistonda uy-joy ijarasi narxlarining oʻsishi tezlashdi — Markaziy bank
Ikkinchi chorakda Oʻzbekistonda ijara haqining yillik oʻsish surʼatlari tezlashdi. Markaziy bank maʼlumotlariga koʻra, iyun oyida kvartiralar ijarasi dollar ekvivalentida oʻtgan yilning shu davriga nisbatan 13 foizga qimmatlashgan. Toshkentda oʻrtacha taklif narxi oyiga 1 kv. m uchun 9,5 dollarni tashkil etdi.
Oʻzbekistonda uy-joy ijarasi narxlari oʻsishi tezlashdi — Markaziy bank
Joriy yilning ikkinchi choragida Oʻzbekistonda kvartiralar ijarasi tezroq qimmatlasha boshladi. Bu haqda Markaziy bankning koʻchmas mulk bozori sharhida soʻz boradi.
Regulyator baholashiga koʻra, bunday dinamika aprel-iyun oylari davomida mamlakat boʻylab kuzatilgan.
Iyun oyida koʻp kvartirali uylardagi kvartiralarni ijaraga berish qiymati, agar soʻmda hisoblansa, 2025 yilning shu oyidagiga nisbatan oʻrtacha 7,1% ga yuqori boʻldi. Dollar ekvivalentida esa oʻsish deyarli ikki baravar koʻp — yillik hisobda 13% ni tashkil etdi.
Shu bilan birga, indeks faqat koʻp kvartirali uylardagi kvartiralar ijarasini hisobga oladi. Yakka tartibdagi uy-joylar hisob-kitoblarga kiritilmagan.
Toshkentda iyun oyida ijara taklifining oʻrtacha narxi bir kvadrat metr uchun oyiga 9,5 dollarni tashkil etdi. Soʻmda bu 1 kv. m uchun taxminan 114 ming soʻm demakdir. Agar kvadrat metrning oʻrtacha qiymati 50 kv. m maydonga ega kvartiraga koʻpaytirilsa, taklif narxi oyiga taxminan 475 dollarni tashkil qiladi.
Oʻtgan yilning iyun oyiga nisbatan poytaxtda ijara narxi soʻmda 5,8% ga, dollar ekvivalentida esa 11,6% ga qimmatlashgan.
Ikkinchi chorakda bozordagi takliflar soni ham oʻzgardi. MB maʼlumotlariga koʻra, ochiq internet maydonchalarida ijaraga berish toʻgʻrisidagi eʼlonlar soni chorak davomida birinchi chorakka nisbatan 4,9% ga oshgan.
Shu bilan birga, chorak ichida dinamika bir xil boʻlmagan. Aprel-may oylarida taklif qisqargan boʻlsa, iyun oyida eʼlonlar soni yana koʻpayib, ushbu pasayishni qisman qoplagan.
Toshkentda uy-joy ijarasiga boʻlgan yuqori talab omillari qatorida regulyator bir nechta jarayonlarni ajratib koʻrsatadi. Xususan, gap xizmat koʻrsatish sohasi va ishbilarmonlik faolligining kengayishi, ichki migratsiya va vaqtinchalik yashashga boʻlgan ehtiyojning saqlanib qolayotgani haqida bormoqda.
Makroiqtisodiy va hududiy tadqiqotlar instituti tahlilidan kelib chiqilishicha, may oyida Toshkentda uy-joy ijarasining mediana narxi 550 dollarni tashkil etdi — bu aprel oyiga nisbatan oʻzgarishsiz qolgan, ammo bir yil oldingiga qaraganda 10% ga yuqori. Eng koʻp eʼlonlar Mirzo Ulugʻbek, Mirobod va Yunusobod tumanlariga toʻgʻri kelgan boʻlsa, eng yuqori narxlar Mirobod, Shayxontohur va Yakkasaroy tumanlarida qayd etilgan.
Bozorning asosiy segmenti ikki xonali kvartiralar boʻlib qolmoqda — ular takliflarning 59,6% ini tashkil etgan; bir xonali kvartiralarning mediana ijarasi 400 dollarni, ikki xonalilariniki — 500 dollarni, uch xonalilariniki — 700 dollarni, toʻrt va undan ortiq xonali kvartiralarniki esa — 800 dollarni tashkil etgan.