O‘zbekistonda uy-joy narxlari o‘sdi, ipoteka kreditlari 48 foizga ko‘paydi
Markaziy bank tahliliga ko‘ra, aholi daromadlari, iqtisodiy faollik va ipoteka kreditlari talabni qo‘llab-quvvatlagan bo‘lsa, qurilish
O‘zbekistonda uy-joy narxlari oshdi, ipoteka kreditlari 48 foizga ko‘paydi
2026-yil II choragida O‘zbekiston ko‘chmas mulk bozorida talab ham, taklif ham bir paytning o‘zida o‘sishda davom etdi. Markaziy bank tahliliga ko‘ra, aholi daromadlari, iqtisodiy faollik va ipoteka kreditlari talabni qo‘llab-quvvatlagan bo‘lsa, qurilish ishlari hamda turar-joyga yo‘naltirilgan investitsiyalar taklifni oshirdi.
Aprel–iyun oylarida respublika bo‘yicha 74,4 mingta ko‘chmas mulk oldi-sotdi bitimi rasmiylashtirildi. Bu ko‘rsatkich o‘tgan yilning shu davriga nisbatan deyarli o‘zgarmagan — o‘sish 0,1 foiz. Hududlar kesimida Xorazm viloyatida bitimlar soni 17,8 foizga, Navoiy va Sirdaryoda qariyb 7,5 foizga, Qoraqalpog‘istonda 6,1 foizga oshgan. Toshkent shahrida esa o‘sish 2 foizni tashkil etgan.
Uy-joy bozorida ipoteka kreditlari asosiy qo‘llab-quvvatlovchi omillardan biri bo‘lib qoldi. II chorakda banklar tomonidan 7,4 trln so‘mlik ipoteka krediti ajratilgan. Bu 2025 yilning mos davriga qaraganda 48 foiz ko‘p. Yilning birinchi yarmida ipoteka kreditlari hajmi 13,1 trln so‘mga yetgan.
Shu bilan birga, uy-joy taklifi ham kengaygan. Yanvar–iyun oylarida 7,7 mln kvadrat metr uy-joy foydalanishga topshirilib, bu ko‘rsatkich bir yil ichida 7,2 foizga oshgan. Turar-joy qurilishiga 27,3 trln so‘m investitsiya yo‘naltirilgan.
Iyun oyida ko‘p qavatli uylardagi xonadonlar narxi birlamchi bozorda so‘m hisobida yillik 6,2 foiz, ikkilamchi bozorda esa 6,3 foiz qimmatlashgan. Dollar hisobida o‘sish mos ravishda 12 va 12,2 foizni tashkil etgan.
Ijara bozorida ham narxlar ko‘tarilgan. Respublika bo‘yicha ko‘p qavatli uylarda ijara narxi iyunda so‘m hisobida yillik 7,1 foizga oshgan. Toshkent shahrida esa o‘rtacha ijara narxi 1 kvadrat metr uchun oyiga 114 ming so‘m yoki 9,5 dollar atrofida bo‘lgan.
Poytaxtda yer uchastkalari narxida yillik pasayish qayd etilgan. Iyun oyida 100 kvadrat metr, ya’ni 1 sotix yerning o‘rtacha taklif narxi qariyb 292 mln so‘m bo‘lib, bir yil avvalgiga nisbatan 9 foiz arzonlashgan. Biroq may oyiga nisbatan narxlar 2,6 foizga tiklangan.
Markaziy bank bahosiga ko‘ra, qurilish hajmi va yangi uy-joy taklifining o‘sishi bozordagi talabni muvozanatlashtirib, narxlarning nisbatan mo‘’tadil o‘sishiga xizmat qilmoqda.