Oʻzbekistonda toʻqqiz oyda 67,9 mingta xonadon foydalanishga topshirildi
2026 yilning yanvar–sentyabr oylarida uy-joylarni foydalanishga topshirish 88,8% ga oʻsdi. Ipoteka kreditlarini 67,6 ming nafar fuqaro 20,9 trln. soʻmga oldi.
Oʻzbekistonda toʻqqiz oyda 67,9 mingta xonadon foydalanishga topshirildi
2026 yilning yanvar–sentyabr oylarida Oʻzbekistonda 67 859 ta xonadon foydalanishga topshirildi, bu oʻtgan yilning shu davridagi koʻrsatkichdan 88,8 foizga koʻpdir.
Toʻqqiz oy davomida 67 598 nafar fuqaro umumiy summasi 20,9 trln soʻm boʻlgan ipoteka kreditlarini oldi.
Ushbu maʼlumotlarni brifingda Iqtisodiyot va moliya vazirining matbuot kotibi, axborot siyosati masalalari boʻyicha maslahatchi Ravshana Umarova maʼlum qildi.
Xisobot davrida «Yangi Oʻzbekiston» turar joy massivlarida 13 408 ta xonadon topshirildi. Ushbu hududlarning muhandislik-kommunikatsiya infratuzilmasini rivojlantirish uchun Davlat byudjetidan 677,1 mlrd soʻm ajratildi.
Umuman olganda, 2026 yilda respublika boʻyicha 140 206 ta xonadon qurish rejalashtirilgan. 1 oktyabr holatiga koʻra, 67 859 ta xonadon foydalanishga topshirilgan. Renovatsiya dasturlari doirasida qoʻshimcha 10 045 ta turar joy foydalanishga topshirildi.
Brifing maʼlumotlariga koʻra, 1 oktyabr holatiga koʻra Oʻzbekiston aholisi soni roʻyxatga olish natijalarini hisobga olgan holda 39,5 mln kishiga yetdi. Urbanizatsiya darajasi 54,5 foizni, shahar aholisi esa 21,3 mln kishini tashkil etdi. «Oʻzbekiston — 2030» strategiyasida shahar aholisi ulushini 60 foizga yetkazish maqsadi qoʻyilgan.
2021 yildan beri mamlakatda «Yangi Oʻzbekiston» turar joy massivlarini kompleks qurish dasturi amal qilmoqda, u nafaqat uy-joy fondini, balki transport, muhandislik va ijtimoiy infratuzilmani ham rivojlantirishni nazarda tutadi. 2022–2025 yillarda bunday massivlarda 55 264 ta xonadon qurilib, foydalanishga topshirildi.
2026 yilga 61 ta turar joy massivida yana 33 926 ta xonadon qurish rejalashtirilgan. 1 oktyabrga qadar 13 408 ta xonadon topshirildi, bu yillik rejaning qariyb 40 foizini tashkil etadi.
2026 yilda ushbu massivlarning muhandislik-kommunikatsiya infratuzilmasini rivojlantirish uchun Davlat byudjetidan 1 trln 152,3 mlrd soʻm nazarda tutilgan. 1 oktyabrga qadar 677,1 mlrd soʻm moliyalashtirildi. Ushbu mablagʻlar yoʻllar qurish, ichimlik suvi taʼminoti va kanalizatsiya, issiqlik taʼminoti hamda elektr taʼminoti tarmoqlarini rivojlantirishga yoʻnaltirildi.
Ipoteka bozorini rivojlantirish davlat uy-joy siyosatining alohida yoʻnalishi boʻlib qolmoqda. 2026 yilga umumiy summasi 23 trln soʻm boʻlgan ipoteka kreditlari ajratilishi nazarda tutilgan.
Ushbu summadan 12,2 trln soʻmi Davlat byudjeti mablagʻlari, 7,8 trln soʻmi tijorat banklarining oʻz mablagʻlari va 3 trln soʻmi «Oʻzbekiston ipotekani qayta moliyalashtirish kompaniyasi» AJ mablagʻlari hisobidan tushishi kerak.
1 oktyabr holatiga koʻra, fuqarolarga 20,9 trln soʻmlik ipoteka kreditlari berildi, bu yillik maqsadli koʻrsatkichning 91 foizini tashkil etadi.
2025 yilning yanvar–sentyabr oylariga nisbatan kreditlash hajmi 39 foizga yoki 5,9 trln soʻmga ortdi.
Umumiy summadan 12,8 trln soʻmi Davlat byudjeti mablagʻlariga, 6,1 trln soʻmi tijorat banklari resurslariga va 2 trln soʻmi ipotekani qayta moliyalashtirish kompaniyasi mablagʻlariga toʻgʻri keldi.
Toʻqqiz oy davomida Davlat byudjetidan ipoteka kreditlari boʻyicha subsidiyalar uchun 1 trln 208,1 mlrd soʻm toʻlab berildi. shundan 407,8 mlrd soʻmi 13 722 nafar fuqaro uchun boshlangʻich badallarni qoplashga, yana 800,3 mlrd soʻmi foiz toʻlovlarini kompensatsiya qilishga yoʻnaltirildi.
Renovatsiya doirasida 2026 yilda 30 mingta xonadon, 2027 yilda esa 35 mingta xonadon foydalanishga topshirilishi rejalashtirilmoqda. Tegishli vazifalar Prezidentning 2026 yil 24 fevraldagi PF-29-son farmoni bilan mustahkamlangan. Bundan tashqari, 2040 yilga borib koʻp xonadonli uy-joy qurilishining umumiy hajmida renovatsiya doirasida qurilgan xonadonlar ulushini bosqichma-bosqich 60 foizga yetkazish rejalashtirilmoqda.
Eskirgan uy-joy fondini yangilashning huquqiy asoslari 2026 yil 10 iyunda qabul qilingan «Shaharsozlik renovatsiyasi toʻgʻrisida»gi qonun bilan mustahkamlandi. Hujjat mulkdorlar huquqlarini himoya qilish, yer resurslaridan samarali foydalanish va shahar qurilishini yangilash loyihalarini moliyalashtirish mexanizmlarini nazarda tutadi.
«Oʻzbekiston ipotekani qayta moliyalashtirish kompaniyasi» AJ faoliyati doirasida toʻqqiz oyda fuqarolarga ilgari berilgan 2 trln 273,1 mlrd soʻmlik ipoteka kreditlari qayta moliyalashtirildi. Ushbu mablagʻlar 9 mingga yaqin fuqaroni qamrab oldi.
Bundan tashqari, 1 594 ta turar joyni ekologik modernizatsiya qilishga 221,2 mlrd soʻmlik ipoteka kreditlari yoʻnaltirildi.
Kompaniya Yevropa tiklanish va taraqqiyot bankdan 685,6 mlrd soʻm hamda mahalliy kapital bozoridan 1,3 trln soʻm jalb etdi. 2030 yilga borib uning ustav kapitalini 5 trln soʻmgacha, ipoteka bozoridagi ulushini esa 20 foizgacha oshirish rejalashtirilmoqda.