Oʻzbekistonda suv omborlarida turizmni rivojlantirish va xavfsizlik talablarini kuchaytirish nazarda tutilmoqda
Oʻzbekistonda suv omborlarida turizmni rivojlantirish va xavfsizlik talablarini kuchaytirish moʻljallanmoqda
Oʻzbekiston Prezidenti Shavkat Mirziyoyev suv omborlarida turistik xizmatlarni rivojlantirish, dam oluvchilar xavfsizligini oshirish va gidrotexnika obʼyektlarining ishonchli ekspluatatsiyasini taʼminlash boʻyicha takliflar bilan tanishdi.
Hozirgi vaqtda mamlakatimizning 5 ta suv omborida turistik faoliyat tashkil etilgan boʻlib, yana 25 ta obʼyektda shunday xizmatlarni yoʻlga qoʻyish salohiyati mavjud. Bu qoʻshimcha investitsiyalarni jalb qilish, ish oʻrinlari yaratish va sayyohlar oqimini oshirish imkonini beradi.
Suv havzalari yaqinida faoliyat yuritayotgan tadbirkorlarni qoʻllab-quvvatlash uchun 2029 yil 1 oktyabrgacha yer va mol-mulk soligʻi stavkalarini 2 baravarga kamaytirish taklif etildi. Bundan tashqari, GPS uskunalari, qutqaruv va himoya vositalari olib kirilganda bojxona toʻlovlarini toʻlashni 120 kunga uzaytirish yoki boʻlib-boʻlib toʻlash imkoniyatini berish rejalashtirilmoqda. Ushbu hududlardagi yer uchastkalarini sotishdan tushgan mablagʻlarni tashqi muhandislik tarmoqlari va yoʻl infratuzilmasini rivojlantirishga yoʻnaltirish taklif qilinmoqda.
Parallel ravishda suvdagi xavfsizlik talablarini kuchaytirish rejalashtirilmoqda. Buning uchun turistik xizmatlarni sertifikatlashni joriy etish va biznesni sohaviy qutqaruv xizmatlari bilan shartnomalar tuzishga majburlash taklif etilmoqda. Xavflarni kamaytirish va tezkor yordam koʻrsatishni taʼminlash uchun suv havzalari yaqinidagi dam olish zonalarini qutqaruv qayiqlari, kuzatuv minoralari va chuqurlik koʻrsatkichlari bilan jihozlash moʻljallanmoqda. Respublikadagi faoliyat yuritayotgan 56 ta suv omboridan faqat 4 ta obʼyektda qutqaruv xizmatlari tashkil etilgani sababli, "Qarqidon" suv ombori misolida professional boʻlinmalarni tashkil etish taklif qilindi.
Taqdimotda gidrotexnika inshootlarining texnik holati ham koʻrib chiqildi, ulardan 25 tasi mutaxassislar tomonidan joyiga chiqqan holda tekshirilgan. Xavfli oʻzgarishlarni oʻz vaqtida aniqlash uchun mahalliy ogohlantirish tizimlari, videokuzatuv, seysmologik uskunalar va raqamli monitoring vositalarini qoʻllashni kengaytirish rejalashtirilmoqda. Muhokama yakunlari boʻyicha davlat rahbari mutasaddi idoralarga suv omborlarida professional qutqaruv boʻlinmalari ishini yoʻlga qoʻyish va turistik obʼyektlar uchun aniq xavfsizlik talablarini tasdiqlashni topshirdi.