Oʻzbekistonda sud faoliyatiga aralashganlik uchun javobgarlik kengaytirildi
Oʻzbekistonda sud faoliyatiga aralashganlik uchun javobgarlik aniqlashtirildi. Endilikda nafaqat bosim oʻtkazish, balki ishning har tomonlama, toʻliq va xolisona koʻrib chiqilishiga toʻsqinlik qiladigan qonunga xilof ravishda taʼsir koʻrsatish ham jazolanadigan qilmish hisoblanadi. Sudga hurmatsizlik qilganlik uchun javobgarlik butun sud binosi hududiga tatbiq etildi.
Oʻzbekistonda sud ishiga aralashganlik uchun javobgarlik kuchaytirildi
11 sentyabr kuni Prezident Shavkat Mirziyoyev sud ishlarini tergov qilish va koʻrib chiqishga aralashganlik uchun jinoiy javobgarlikni aniqlashtiruvchi qonunni imzoladi. Oʻzgartirishlar, shuningdek, sudga hurmatsizlik qilganlik uchun maʼmuriy javobgarlikni ham kengaytiradi.
Hujjat Qonunchilik palatasi tomonidan 24 fevralda qabul qilingan va Senat tomonidan 19 mayda maʼqullangan. U 12 sentyabrdan kuchga kirdi.
Asosiy oʻzgarish shundan iboratki, Jinoyat kodeksining 236-moddasi endi tergovga va sudga aralashishni alohida-alohida tartibga soladi. Sudga bosim oʻtkazganlik uchun javobgarlik kengaytirildi: nafaqat adolatsiz qaror chiqarilishiga erishish maqsadidagi taʼsir, balki ishning har tomonlama, toʻla va xolisona koʻrib chiqilishiga toʻsqinlik qilishga urinish ham jazolanadigan boʻladi. Bundan tashqari, himoya xalq maslahatchilariga ham tatbiq etildi. Bunda sanktsiyalarning oʻzi oʻzgarishsiz qoldi.
Bunday aralashuv uchun ilgarigidek uch yilgacha axloq tuzatish ishlari, bir yildan uch yilgacha ozodlikni cheklash yoxud uch yilgacha ozodlikdan mahrum qilish jazosi nazarda tutilgan.
Agar ushbu harakatlar mansabdor shaxs tomonidan sodir etilsa, jazo kuchaytiriladi: muayyan huquqdan mahrum qilgan holda uch yildan besh yilgacha ozodlikni cheklash yoki ozodlikdan mahrum qilish.
Oʻzgartirishlar Maʼmuriy javobgarlik toʻgʻrisidagi kodeksning 180-moddasiga ham kiritildi.
Agar ilgari sudga hurmatsizlik qilish toʻgʻrisidagi norma sud majlisi vaqtida tartibni buzishga taalluqli boʻlgan boʻlsa, endi unga «yoki sud binosida» degan soʻzlar qoʻshildi.
Shu tariqa, maʼmuriy javobgarlik bevosita sud binosida belgilangan tartibni buzganlik uchun ham, hatto bu sud majlisidan tashqarida sodir boʻlsa ham qoʻllaniladi.
Qonunda qayd etilishicha, oʻzgartirishlar sudlar mustaqilligi va sudyalar daxlsizligini mustahkamlashga, shuningdek, ularning faoliyatiga har qanday aralashuvning oldini olishga qaratilgan.