Oʻzbekistonda propan narxi 60 foizdan koʻproqqa oshdi

Oʻzbekistonda propan narxi 60 foizdan koʻproqqa oshdi

Oʻzbekistonda suyultirilgan gaz (propan)ning birja qiymati bir kunda 60,6 foizga koʻtarilib, bir tonna uchun 11,9 million soʻmga yetdi. Savdo sessiyasi davomida bir tonnaning narxi taxminan 4,5 million soʻmga oshdi.

Oʻzbekiston respublika tovar-xomashyo birjasi maʼlumotlariga koʻra, 17 sentyabr kuni propanning oʻrtacha narxi bir tonna uchun 11 million 904,9 ming soʻmni tashkil etdi. Shu kuni savdolar hajmi 914 tonnaga yetdi.

Narxlarning oshishi suyultirilgan gaz bozori faoliyati qoidalari oʻzgarishi fonida yuz berdi. Prezidentning 12 sentyabrdagi qarori bilan Oʻzbekistonda ishlab chiqariladigan va import qilinadigan suyultirilgan gaz, oʻz shoxobchalarida sotiladigan hajmlardan tashqari, birja savdolari orqali sotilishi belgilandi. Shu bilan birga, birja narxining tovarni savdoga qoʻyish narxiga nisbatan oʻsishining ilgari amalda boʻlgan chegarasi bekor qilindi.

Hujjatda, shuningdek, aholini suyultirilgan gaz bilan taʼminlash sohasiga bozor mexanizmlarini bosqichma-bosqich joriy etish va LPG-Trade kompaniyasini tashkil etish koʻzda tutilgan. Bunda aholiga gaz yetkazib berish ustuvorligi saqlanib qolishi kerak.

Bundan tashqari, mart oyida Raqobatni rivojlantirish qoʻmitasi propanning yirik importchilariga nisbatan tekshiruv oʻtkazgan edi. Tekshiruv yakunlariga koʻra, 31 ta tadbirkorlik subʼyekti narxlarni asossiz ravishda oshirish va raqobatga zid harakatlarda aybdor deb topilib, jarimalarning umumiy summasi 28,9 milliard soʻmni tashkil etgan edi.